真人騷
含蓄的魚蛋 譚小環：冇后冠舒服啲！
20年前摘下港姐后冠， 20年後在銅鑼灣開檔賣魚蛋，當港姐遇上魚蛋，令譚小環檔渣哥成為今年度橫跨娛樂和魚蛋界的大事。
本來想整條「 Miss Fish Ball 2014」 banner做道具賀一賀佢，卻遭到平時好相與的小環婉拒：「我都係普通人一個，唔想咁重口味，冇后冠件事會令我舒服啲。」
魚蛋墨丸因此變身小環手上的金波與白波，原本「激烈的海膽」的構思變成現下「含蓄的魚蛋」。
她說她生平「最怕太突出、怕走得太前」。
別看小事一樁，其實說明了為甚麼港姐冠軍出身一度人氣爆燈的她，當年沒能坐穩當家花旦的寶座，從女一變女三，角色從女神變八婆，被大台御用閒角一綁就綁了 20年，直到 41歲，才因為老公一句話淡出轉行。
別人話當年，都愛不厭其煩話當年勇，跟譚小環講港姐，她說：「唔化妝，俾人話有冇搞錯：港姐都咁求其走出街，化咗妝，又話誇：使唔使出個街都咁行，港姐后冠其實係枷鎖，除咗佢舒服好多。」
六叔好好傾
Q：你選港姐時有冇試過俾人批踭？
A：我好啲，因為我係 1號，右邊冇人企，至少 2號（李綺紅）嗰個冇批我踭。
Q：還記得做港姐冠軍嗰一晚嗎？
A：記得，當年做港姐冠軍好大件事，我有諗過入三甲，但做冠軍就好意外。做港姐冠軍同其他名次件事完全唔同，因為太大件事，大到我唔識享受。
Q：點解咁講？
A：會考考得好，我開心終於放下心頭大石，考到空姐第一日飛，我拖住喼，覺得自己巴閉喇、終於識搵錢喇，嗰啲開心好實在，好快樂。但係做港姐，意外多過開心，因為做咗冠軍，未來嗰一年就唔可以做自己，就要帶住港姐嘅枷鎖做人。
Q：仲要坐喺六叔隔離睇台慶？
A：係啦……哈哈，不過你唔好話，其實六叔好好傾……
Q：佢同港姐傾啲乜？
A：講下養生之道囉，話俾我聽其實做氣功對身體真係好好囉，不過又唔傾得耐……
Q：冇錯，個鏡頭成日會對住你哋。
A：係囉，冇理由影住我哋仲傾偈㗎？做港姐冠軍就係咁，鏡頭無時無刻對住我。出名原來係幾驚，人人識我，人人知我係香港小姐，出街食個飯，無數對眼睛望住我：「嘩！佢食喇！」「嘩！佢擘到個口好大！」「嘩！佢食完冇抹嘴嘅！」其實我唔知人哋講乜，但係我停止唔到估人哋講乜，大佬呀，港姐都係人，港姐都要食飯都要撩牙都要去廁所㗎！
八婆這角色
Q：所以你唔太享受所謂的事業最高峰？
A：都係，人哋紅係追求名利，名我有，但係我唔慣。利呢，做戲還好，一做歌星就一日走幾場，搭車服裝化妝整頭樣樣都係自己錢，反而蝕。唔係我想做歌星，係人哋叫我、我就去做。
Q：因為你唔享受，又冇乜霸氣，所以唔可以保得住當家花旦嘅位耐？
A：都係嘅……人人做娛樂圈都係想出位，為出位，咩手段我都見過……我覺得 quote例子冇意思，佢哋咁做我明，但係我唔得，所以我唔適合娛樂圈。
Q：還記得事業走下坡，第一次演八婆角色係邊套劇嗎？
A：《勇探實錄》，有張家輝同袁潔瑩，我第一次做配角，仲要係個八妹仔。開頭我都驚，覺得有啲負面，怕會影響形象。係監製勸我：「你都做咗咁多年啦，唔好俾一個形象框死自己，應該乜嘢角色都試下！」
Q：佢哋勸你時係話唔好框死自己，實情電視台打後十年都係用個八婆角色框死咗你。
A：都唔怪得佢哋嘅，始終係大台，承受唔到太多風險，既然試咗一次我可以演呢嘅巴渣角色，咁穩陣啲，就次次搵我囉。
Q：次次接到劇本都係八婆角色，點解唔推咗佢？唔辭演？
A：對白差唔多嘅，咪自己改下個 tone囉；角色差唔多嘅，咪睇下對手戲同邊個做囉？遇着黎耀祥、阮兆祥呢啲，內裡都有樂趣嘅。又未去到要辭演咁誇，咁我都要搵錢㗎！
Q：不停做八婆角色，有冇試過出街俾師奶鬧？
A：都有嘅，喺街俾人問到，點解你喺戲入面咁衰，你真人係唔係都係咁？呢啲我會聽完就算，一笑置之。一嚟我樂觀，二嚟都係打份工，有太多嘢比工作更重要更煩擾，呢啲都上心咪好唔得閒？
老公叫我轉行
Q：其他更重要的事即係乜？
A：即係我自己嘅生活，同埋我老公囉。 07年結婚後，我都一路拍緊劇，雖然套套唔係主角，但同時間都有兩、三套揹喺身。老公瞓覺時等唔到我返嚟，到佢瞓醒我又已經出咗門，佢話結婚後見我仲少過拍拖嗰陣。
Q：咁又係，始終陪你過埋下半世嘅唔係大台，係你老公。
A：冇錯，佢覺得婚後反而同我少咗溝通，我嘅脾氣都大埋。呢行好講團隊精神，過去二十年，我都係嗰啲寧願早到等人，好過人等我嘅演員，呢個習慣帶到返屋企、帶埋去見朋友，係我老公話我唔識生活、冇咗自己，係佢提議我停幾年，唔好拍劇住。
Q：你唔留戀電視台嗎？
A：我鍾意做戲，但係演嚟演去都係嗰啲，年紀越大，戲路只會越窄，我係時候諗，如果要同呢個人過埋下半世，係唔係仲要繼續呢種每日 06到 28嘅生活。
Q：係唔係你做港姐 20年嚟第一次停？
A：都係，突然間好唔慣，突然多咗好多時間，我去學整蛋糕，學打網球，學做手作，然後老公再提議我同夾份開手作店、開小食店。過去四十年，都係人哋叫我去做乜就做乜，唱歌係、做戲係、演八婆都係，第一次自己話事自己決定，原來都幾好呀！
|
鍾意就快D Share啦！
|
|
|