掃呢頁CODE去手機

2014年9月12日 星期五

[忽然1周 998] 大台劇集超能力大全 MW,




靚抽王

大台劇集超能力大全

大台劇集高潮唔多,不過勝在笑位多。每個星期,神聖嘅網民都會喺大台劇集入面,搵到一大堆穿崩位、犯駁位,呢啲其實都唔係咁出奇,近年仲多咗樣,就係超能力位嘞!明明係一套寫實嘅劇,點解都有超能力劇情?觀眾們,不要問,只要信,不管你們笑不笑,反正我笑鳥。

《使徒行者》賀 Chok峯離巢

Chok峯將會告別大台,以後就唔可以喺大台睇到佢嘅精湛 chok爆演出喇!可惜人哋明明就走,大台都一樣唔放過佢,整番套《使徒行者》佢嘆,網民們又再熱烈地彈琴熱烈地恥笑。

Chok峯被踢飛 5米

早前有報道指成龍飛踢房祖名,犀利嘅網民喺《使徒行者》睇到呢個 Chok峯被踢飛 5米嘅橋段,驚嘆大台編劇有預知能力。另一方面,被架車撞都係撞開 5米啫,被人打飛 5米都唔死,係唔係睇得《龍珠》太多?

Chok峯宇宙最強上身

嗰頭俾人踢完,過幾集 Chok峯卻以一敵百打低成班古惑仔,成個宇宙最強咁款,打完仲寸爆叫囂,恍似對大台嘅安排發出一聲怒吼咁!果然,離開大台嘅人一般都係帶住憤恨離去嘅。

搞乜鬼荷里活叛逃

大台唔知係唔係睇荷里活科幻片睇得多,成日都鍾意搞大場面,點知次次都弄巧反拙成為恥笑對象,《叛逃》算係近年最多出位動作嘅膠劇之一。

世界級跳樓

劇入面關禮傑同陳展鵬雙雙喺呢幢大廈跳去另一幢大廈,破晒世界跳遠紀錄。同時間,硬膠劇情確實係教壞人。試諗吓,關禮傑喺劇入面作為警官,俾學員挑釁兩句就唔理危險鬥跳樓。佢哋係唔係應該先去測吓智商先做警察呢?

拳王膠倫布

可能因為靠創意同實力唔能夠引大家注目,於是惟有靠騎呢劇情同埋穿崩位引大家睇落去。呢樣嘢我哋都可以理解嘅,劇集《神探高倫布》就有齊晒呢啲元素嘞:

未來汽車

眼利嘅網民發現,劇中 60年代嘅香港竟然出現一架 Toyota99年款嘅棺材車!證明高倫布真係能夠順利進出未來。

我和拳王有個約會

第 17集入面,高倫布同包平安突然無啦啦打起上來,打鬥場面更媲美《 22世紀殺人網絡》,有網民笑稱呢個場面 9唔搭 7,我哋深表認同;亦有人話呢個動作場面接近奧斯卡級數,我哋認為呢個評價如果唔係講笑,就一定係踩緊奧斯卡。

打你唔死狙擊系列

講到超能力,點可以錯過無記嘅 XX狙擊系列同埋號稱無敵不死身嘅除紙衫呢?

2011年《潛行狙擊》

劇裏面除紙衫心口中槍被掉落海都唔死得,係整個不死身傳奇嘅開始。

2013年《神鎗狙擊》

除紙衫喺劇入面避子彈,大爆炸下飛來飛去都安然無恙,將不死身傳奇推上高峰。

2015年《鐵拳無敵除紙衫 vs哥斯拉》

我哋驚大台玩無可玩,純粹建議吓啫,嘻嘻。

2014年《點金勝手》

跌落山崖再次死唔去,令網民驚覺到,查實唔係徐小姐嘅問題,因為基本上套套劇都有槍戰、跌落山、大爆炸等嘅劇情,而同時啲主角係死極都死唔去嘅。

徐小姐被網民稱為膠 TVB四大奇人之一,威呀!

荒謬現象學

每期荒謬現象學為你解構娛圈嘅不尋常現象!



鍾意就快D Share啦!