探熱針
生人勿近 大台出手 周子揚禁黐陳凱琳
現年三十歲的西貢地王太子周子揚與何傲兒耍完一輪花槍後，最終不敵七十六歲阿伯林建名，出局！一雞死一雞鳴，有份拍新劇《四個女仔三個 Bar》的他，決定越級挑戰，對去屆港姐冠軍陳凱琳，痰上頸。
不過屋企有地唔係大晒，被大台視為可造之材、被嚴密保護的陳凱琳即時收到高層「溫馨提示」，盡可能遠離愛放料的周子揚，以免唔食羊肉一身羶，搞到 cheap晒！至於周子揚，亦被「提點」要他搵食行遠啲，勿近陳凱琳！
主動撩傾偈
周子揚和何傲兒一段快閃戀，連環斷正，男方被指放料，以緋聞換人氣。小花重投老樹蔭，被撇周子揚不癢不痛，立即轉向，瞄準在新劇《四個女仔三個 Bar》中，只有極少對手戲的廿三歲富貴民選港姐陳凱琳。
「周子揚喺劇中係同劉佩玥（港姐季軍）一對，同阿 Grace（陳凱琳）碰頭嘅場口唔多，但只要一有機會，佢就黐埋去同人哋傾偈。 Grace唔知道對方有企圖，大家又一齊開工，所以初時同佢都幾好傾，後來公司叫阿 Grace唔好俾佢埋身，免得搞 cheap晒自己。周子揚都收到『傳話』，叫佢專心工作唔好搞咁多事。而家就算同場，阿 Grace寧願黐住張繼聰，周子揚就自己行埋一邊坐，唔敢再搞公司個金笸籮。」劇組工作人員說。
嚴防奀星埋身
大台缺人，鎖定陳凱琳力捧，做主持、拍劇外，更打算谷她做歌手。
「 Grace未卸任已經接咗三套劇，喺《商戰》同視帝黎耀祥做對手，喺《四個女仔三個 Bar》同《張保仔》都擔正，公司仲幫佢傾緊歌星約，梗係唔想佢俾啲煲水戀聞影響，尤其係惹埋啲奀星！之前佢同大隻仔溫家偉合作主持飲食節目，大隻仔追佢，都即刻被人踢出局，公司睇得阿 Grace好緊。」一名無綫人說。
都未正式落手，周子揚已經被公司攔腰截停。事後他在微博扮無辜，聲稱要用平常心去面對不同經歷。至於被打主意的陳凱琳，對於西貢地王太子有非分之想，亦劃清界線。「都冇話避唔避嘅，好少同佢同場；劇中佢成日呃劉佩玥，所以我個角色唔鍾意佢。」
做小花有代價
去屆港姐冠亞季陳凱琳、蔡思貝和劉佩玥身邊有唔少飛來蜢，但公司講明要專心工作才有上位機會，總之拍拖見光死。
蔡思貝
三位港姐中，以亞軍蔡思貝最多緋聞，有崔建邦力追外，又傳與舞蹈總監麥秋成在將軍澳有愛巢同居，之後又被指與鄭俊弘撻着，在對方的處男騷上親自送花。拍新劇《衝線》時，又傳與沈震軒、羅仲謙特別有火花，唔似得拍其他戲份，狂 NG。
|
鍾意就快D Share啦！
|
|
|
