2014年9月14日星期日

前日戴婚戒今日除? 周杰倫承認：婚禮不能一拖再拖周杰倫,

前日戴婚戒今日除? 周杰倫承認：婚禮不能一拖再拖

2014-09-14 17:44:00

周杰倫(Jay)今日現身上海，出席「2014觀瀾湖世界明星賽記者會」，為咗感謝周董成為呢個明星賽嘅推廣大使，大會集團主席朱鼎健為Jay特別訂製咗一支雙節棍哥爾夫球棍，又話喺海口嘅Hard Rock酒店，有間總統套房會以Jay命名，大堂又會展示周董嘅樂器等等，而酒店首席執行官Hamish Dodds又送咗支特別結他俾周董做見面禮。

周董同3位主禮嘉賓做推桿儀式，佢自言哥爾夫球技術唔好，所以推咗一陣先成功。前日周董喺北京出席記者會，左手無名指多咗隻戒指，被指係戴上婚戒，今日所見佢「兩手空空」乜都冇，但心情依然大靚。周董自言同Hard Rock酒店好有緣，佢初次出席發布會係喺台北Hard Rock酒店，當時唔慣受訪，連攞咪都唔識，所以現場冇人聽到佢講乜，話估唔到14年之前真正合作，所以外乎份外有意義。

周董又表示:「會給意見酒店，如何做出周杰倫的中國風格出來，如果到時巡迴去到當地，自己會帶一百幾十人住這間酒店。」然後搞笑望住朱鼎健:「應該是免費的吧?」又話到時歌衫索性除落嚟唔洗，夠晒原汁原味。然後周董又好識做，大讚朱鼎健做開運動，有胸肌仲擋住佢視線添。

周董似乎對肌肉好有興趣，佢話到時希望明星賽見到「美國隊長」Chris Evans，睇下佢肌肉有幾大喎，又話個比賽球技唔及愛心重要。

到記者提問環節，問佢做咩除晒手上啲戒指，係咪怕fans呷醋定係感情有變?周董一開始扮晒嘢問:「哪一天?」再講係前日北京記招，佢話:「哦~造型師安排的，他叫我戴我就戴，哪一隻手指沒理會，亦不介意，很驚訝他給三四隻戒指，今天沒有準備給我，就是這樣簡單。」

問到佢年底出新碟，但又傳1月結婚，會唔會太趕，司儀幫口擋駕話只可問活動有關問題，不過周董笑笑口話:「反正說跟沒說也一樣，我說話36歲前，明年1月18日之前會做一件有意義的事，若果是成家立室也不錯，現在專輯為先，婚禮不能一拖再拖，所以專輯要快點完成。」

有內地記者問大會Justin Bieber係咪會參加?朱鼎健弟弟朱鼎耀表示:「本來真的有邀請，但是他在美國遇到麻煩，不方便來中國。」而大會宣傳片中，亦見到韓國紅星全智賢及Rain有份。