掃呢頁CODE去手機

2014年10月10日 星期五

[忽然1周 1002] 陳慧琳開題:邊位男藝人每個禮拜都去焗油? 陳慧琳,MW,




IQ考考笑

陳慧琳開題:邊位男藝人每個禮拜都去焗油?

出名貪靚兼有姿整皇后美譽嘅陳慧琳,今次出 IQ題唔講蝦餃仔同小龍包,反而同大家玩食字,仲話冇番咁上下智慧嘅人一定估唔到囉!媽咪姐依家先知原來貪靚同 IQ題都可以扯上關係。

泳兒:我係咪一定識佢?

泳兒雄心勃勃咁話自己答 IQ題一定掂,點知……猛問:「幾多個字?我係咪一定識?拍戲?亞洲人?」問咗咁多提示,最後當然順利估中啦,咁都答唔中就真係抵打。

張敬軒:冇難度喎!

唱而優則演嘅軒仔張敬軒,呢一年唔係拍戲就係演舞台劇,原來 IQ題對佢嚟講易過借火。佢只係反問一句:「係唔係華人?」跟住唔使 2秒就答中。之後軒仔好得戚咁話:「冇難度喎!下次問啲難啲啦。」

陳明恩:真係考到我

鬼妹陳明恩話可能係人名嘅關係,而考起佢,「估中文名…… O……!有冇其他 tips?陳法拉?真係考到我喇!」用咗超過一分鐘都係估唔到,要開估。佢一聽見個答案就話:「我好鍾意佢呀!」

羅力威:以為身體焗油呀!

羅力威一聽完個問題即問有冇 tips,之後自己試答,「大家都識?禮拜……唔識呀!」記者再講多次問題,羅力威竟然話:「焗油?我以為身體焗油呀!咁我知答案喇!」雖然佢真係答中,不過身體焗油呢樣嘢都真係第一次聽囉!

趙增熹:咩地方嘅人?

文質彬彬嘅趙增熹,佢話估唔到有人考佢 IQ題,聽問題前仲表現得好緊張。佢笑笑口話:「焗油?咩地方嘅人?俾啲時間我諗……(好認真諗咗 1分鐘)周 XX,係咪呀?」係呀!叻喇,你估啱咗喇!

答案:周潤發



鍾意就快D Share啦!