2014年10月17日 星期五

[忽然1周 1003] 網民新偶像:紀律部隊三子 MW,




靚抽王

網民新偶像:紀律部隊三子

呢期最紅嘅組合,除咗有嗌交多過夾 Band嘅 Beyond三子,同埋佔「鐘」(金鐘)多過佔「中」(中環)嘅佔中三子之外,仲有因佔領活動,每日都要出嚟開記者會,來自警方及消防處嘅許 Sir、梁 Sir同朱 Sir。今次佔領活動、除咗證明香港人真係好鬼死和平之外,亦都證明我哋嘅創意真係無鬼限加無鬼聊。淨係睇呢三個由網民自發開啟嘅臉書專頁就知

三個專頁分別係:「梁 Sir陪你談數據」、「朱 sir馬路的事」、同埋 like數多達5萬嘅「四點鐘許 sir」,每日呢幾個專頁都會模仿幾位阿Sir嘅講嘢公式嚟報告一番。譬如阿許 Sir會不斷重複以下金句:「或者我再重申……多謝你嘅問題……我再重申一次…… I will now recap in English……」

四點鐘許 sir

朱 sir馬路的事

梁 Sir陪你談數據

另外有網民就認為,四點鐘許 Sir個樣好似《龍爭虎鬥》嘅打星楊斯,同埋星爺啲戲入面嗰個如花。或者我再重申一次, I will not recap in English, Four o'clock Hui Sir look like The Yu Far who acting in Stephen Chow's Movie.

一代之鋒之終極幻想

香港 18歲學生黃之鋒早幾日上咗《時代雜誌》嘅封面,大家都未留意雜誌嘅內容,就深究個封面點解阿之鋒會多咗對「耳」,原來係個M字咁啱放咗喺度。有反佔中嘅網民更話,嗰對唔係耳,係魔鬼隻角……唉,佢究竟係神嘅使者,定係地獄派嚟嘅惡魔?計我話,佢之不過係一個有思想有理想嘅學生啫,你班大人唔好癲啦,係睇得大台啲膠劇太多定係荷里活啲災難片睇壞腦呀?

Cap圖龍虎榜

平日一打開 facebook同 WhatsApp,可謂 cap圖滿天飛, cap圖已經成為我哋生活嘅一部分。今期至新至 hit嘅 cap圖係乜?睇 cap圖龍虎榜!



鍾意就快D Share啦!
Related Posts Plugin for WordPress, Blogger...