[壹週刊 1284] 詐晒型 主音 Alan停工做十億駙馬 Mr.見財化水 M1,

探熱針

詐晒型　主音 Alan停工做十億駙馬　 Mr.見財化水

樂隊 Mr.主音布志綸（ Alan）下月同拍拖四年的富貴女友 Sally結婚，雖然有個逾 10億身家的未來外父「玩具富豪」陳明耀做後盾，但 Alan依然節衣縮食儲百萬老婆本，靠自己。

兄弟做老襯， Mr.成員雖然戥人高興，但對 Alan要求十一月開始連放兩個月假，大家就相當頭痕。又係嘅，冇咗主音，其他人兩個月食穀種，大把時間去佔中。

儲定百萬老婆本

今年情人節求婚成功的 Alan，將於十一月七日在四季酒店設宴迎娶女友 Sally。

「女家嗰邊有好多生意朋友，但四季個場地方有限，所以只係擺廿圍。個婚禮要使成百萬， Alan堅持自己搞掂；佢幾年前已經開始儲錢，揸殘車、著舊衫死慳死抵，加埋 Mr.今年不停有騷唱，都算賺到。 Alan顧住搵錢，負責籌備婚禮嘅 Sally之前緊張到瘦晒，但影完婚紗相唔使 keep又圓潤番。 Sally話想養好身體盡快生 BB。」知情者說。

Alan與女友 Sally拍拖四年，一直低調處理感情事，間中才被拍到齊齊夜蒲照。

一向很重親情的 Alan，與父母、妹妹感情要好，是位孝順仔。

Sally的爸爸身家超過十億元，愛女深切，拉頭馬也會帶埋 Sally去。

女友 Sally是億萬千金小姐， Alan對她呵護備至。

唔靠外父租屋住

Alan做十億駙馬， Mr.成員擔任兄弟團；但對於準新郎堅持由十一月起連放兩個月假慰妻，大家就有點微言。

「 Mr.喺香港工作唔多，但佢哋之前出咗國語碟，計埋內地、台灣、東南亞其他地方，其實不停有 job，主音停工，大家就見財化水。班兄弟想佢縮短假期，不過 Alan企硬，好在大家一齊咁多年，未至於搞到好唔開心。」

老婆外家做生意， Alan亦計劃婚後試搞小生意，為一頭家開拓錢途。

「 Sally成日讚 Alan有上進心，對搞生意方面都俾咗唔少意見，不過 Alan唔想同老婆夾份，話自己搞；就算結咗婚， Alan都唔肯住外父啲物業，佢話儲到錢買屋俾老婆之前，都要租屋住。」知情者說。

二○一○年， Alan剛認識 Sally並展開熱烈追求，當時在女方九龍塘屋企外，與 Sally的前男友打架，捲入桃色糾紛。

因為四季酒店 ballroom不夠大，所以 Alan未能宴請太多圈內朋友參加其婚宴，就算同公司的 Kary與關楚耀也未受邀請。

投資有道

Alan的未來外父、萬利玩具有限公司主席及行政總裁陳明耀，是香港著名工業家，身家逾 10億。

萬利玩具早年已打入海外市場，超過六成訂單來自歐美等地，產品曾多次獲國際性的玩具設計大獎。經商有道，陳明耀亦懂投資，手上至少持有七個超豪物業，包括市值逾 3億元的九龍塘獨立屋，平日出入 Bentley代步，同時亦是兩匹已退役的名駒「玩具神話」及「玩具雄心」馬主。

鍾意就快D Share啦！

下一篇 》