食完消夜後，大孖和蔡思貝轉場食糖水，過馬路時都玩一餐，非常 sweet。
探熱針
酒店爆房 蔡思貝姣擒周志文
新一代港姐姣精蔡思貝，雖然同大隻舞男麥秋成拍緊拖，但先天進取主動，緋聞依然一單接一單。拍無綫新劇《衝線》，蔡思貝主動黐男主角羅仲謙外，上月出埠到台灣拍外景，又發功姣掂「巨聲大孖」周志文，甚至主動摸上對方酒店房過夜。返港後，二人再相約食飯歎糖水，甚至在馬路中心拖手，繼續偷食真人騷。
酒店房過夜
上月無綫重頭劇《衝線》到台灣拍外景，首次孭重飛做女一的蔡思貝，拍劇不忘施姣功，跟男主角羅仲謙嘴出火邀對方食消夜外，又狂電「巨聲大孖」周志文，拖手仔傾密偈。蔡思貝姣得光明磊落，擺明車馬，聲言唔怕大孖𡃁模女友 CoCo袁紫僑呷醋。
去到台中拍外景，見名草有主的羅仲謙刻意同自己保持距離，蔡思貝索性集中火力，生擒大孖。
「喺台灣拍外景咁耐，成大班人晚晚都會約埋一齊食飯，有晚思貝同大孖兩個都飲咗好多酒，未食完飯已經好 high，之後返到酒店，思貝仲直接去咗廿四樓大孖間房，第二朝早先返自己房換衫開工。其實喺台灣咁多日，大家都有眼睇，兩個肯定撻着咗。」工作人員透露。
女友變心
據了解，大孖出發到台灣開工前，有米𡃁模女友 CoCo突然主動攤牌講分手，更表明移情向太陳嵐大仔向佐。
「 CoCo同向佐都係跟伍允龍學功夫，成班徒弟經常約埋食飯同上堂，佢同向佐零舍有 feel，加上同大孖咁耐感情淡咗，咪索性嗌分手囉。」知情者說。
互餵糖水
突然被飛，面對熱情蔡思貝，一拍即合。上週三（十月八日）晚，蔡思貝撇低大隻男友麥秋成，跟大孖到錄音室探吳若希，再一行人到九龍城路邊雞食消夜。
約凌晨一點，吳若希跟同行友人揸車先行離開，留下蔡思貝同大孖二人世界。兩人在馬路中心大聲講大聲笑，蔡思貝更主動伸出「友誼之手」，拖住大孖唔放。之後二人搵地方歎糖水，甚至毫不避忌互餵，痴纏到凌晨兩點。
四角關係
明明甜蜜蜜，但離開糖水鋪後，二人在街上傾唔夠幾句，蔡思貝突然黑晒面截的士走人。被撇低的大孖到附近買生果，之後打了幾個電話，便搭的士返回何文田屋企。
「其實大孖近排都幾煩，佢同思貝撻着無幾耐， CoCo又發現向佐一腳踏兩船，想同大孖復合，而家搞到七國咁亂，大孖都未決定點。」知情者說。
發電機 VS集郵王
2013年港姐亞軍蔡思貝，入行短短一年，緋聞戰績彪炳，成新一代港姐姣精。
被發電機電親的大孖周志文，花心情史亦有番咁上下，因為專溝有錢女，被稱新一代「軟飯集郵王」。
|
鍾意就快D Share啦！
|
|
|
