艾威太太子宮瘤再度復發，卻不肯做手術。
探熱針
太太子宮生巨瘤 艾威：佢唔肯做手術！
一直發牌無期的香港電視，下月將透過網絡及應用程式開台。對於身為 HKTV員工、一度徘徊失業邊緣的艾威（原名徐威信），原本是好消息，但眼見自己太太腹中子宮纖維瘤急速生長，已經擔心死，因為老婆看似有了八個月身孕，朋友誤以為巨瘤係巨 B，紛紛恭喜艾威做老豆。
「唔好再埋嚟恭喜我，太太個瘤好大，但佢一直唔肯做手術。」艾威無奈說。
割完又生
被子宮纖維瘤纏擾多時的艾威太太，早年曾接受過切除手術，雖然屬良性，但醫生曾作出警告，子宮纖維瘤復發機會相當高，要好好注意身體。
「第一次做完手術，醫生已經提醒佢哋可能有機會再生，叫徐太要注意飲食同作息時間，唔好令自己有太大壓力。點知真係復發，艾威勸老婆再做手術，但太太唔想捱多刀，就算叫埋身邊朋友幫口，軟硬兼施，徐太都當耳邊風；拖吓拖吓，個瘤愈嚟愈大，而家已經超過十 cm，醫生警告話一旦病變或者爆咗，會好危險。」知情者透露。
巨肚似有孕
由於纖維瘤不斷急速生長，艾威太太的腹部，十足有了八個月身孕的大肚婆。
早前，本刊記者發現頂着巨肚的艾威老婆同老公行九龍城，艾威到櫃員機提款後，兩公婆十指緊扣到附近的素食店買外賣。
當日穿上藍色緊身衫，外加黑色闊身薄紗背心的徐太，巨肚現形，不知就裡，的確會誤會是佗 B。
「徐太好硬頸，話之前割完又生，不如唔好割，點都唔肯再做手術。艾威唔敢逼佢，又唔敢鬧佢，試過 book晒手術床都唔肯入院，兩公婆有時因為手術問題有拗撬，但次次都係艾威認矮仔先。」知情者說。
太太扭計
結婚十二年，一直風雨同路。港視發牌受阻，艾威面臨失業揚言賣錶賣車賣樓，甚至轉行做鞋匠，太太亦從旁支持，甚至交出私己積蓄，共度難關。
對於太太生巨瘤，艾威直認不諱。
壹：壹週刊 艾：艾威
壹：太太而家狀況係點？
艾：已經安排咗做手術，都好呀……借呢個機會同大家講，佢俾人以為有咗 BB，啲朋友成日埋嚟恭喜我，又要解釋一大輪。
壹：之前已經做過手術？
艾：係呀……係呀！幾年前，我都唔係好記得個時間，好耐嘞！做咗之後，跟住慢慢又再大番。即係第一次個手術切得唔徹底囉。
壹：個瘤大概有幾大？
艾：好大囉！你哋睇相都見到啦，直情成個大肚婆咁。先排我拍緊《三面形醫》，咁啱我哋有個顧問醫生係婦產科，我咪 book時間叫醫生同我太太檢查，然後幫口說服佢快啲做手術，但都搞咗好耐。
壹：太太今次真係肯做手術？
艾：唉！我都唔知……佢今次又講話今個月做，話排咗期！講就講咗好耐，但太太唔當係一回事，我俾佢激死。
港視面對重重打壓，亦成功開台，艾威太太，也能排除萬難，順利完成手術。
打不死
55歲的艾威（徐威信）， 1978年無綫藝員訓練班出身，效力大台逾 30年，演活多個小人物角色，是其中一個「綠葉王」。 12年，艾威轉投王維基旗下的香港電視網絡，但港視發牌一波三折，徘徊失業邊緣的艾威，決定出書搵食自救，處男作《情聖賭神之終極一注》，公開自家鑽研的百家樂方程式，加上圈中人力撐，一口氣接了四部電影，還有舞台劇、網上電台主持、拍廣告，令他無須為兩餐食，向大台扮矮仔。
|
鍾意就快D Share啦！
|
|
|
