政總員工原來係臨記
【雨傘革命】無綫新聞大前日播出一段佔中影響政總員工上班片段，有眼利網民發現有員工是臨時演員，這位曾在無綫當臨時演員的黃海權，屬無綫合約臨記公司天王影視製作旗下，惹來網友質疑有人請臨記演戲扮返工。雖然黃海權昨自稱是臨記也是政總臨時保安，但消息曝光後，天王影視老闆老三即聲稱黃海權已離職，認真巧合。
大前日示威者留守政府總部，並堵塞政總一條上班通道，無綫新聞拍下片段，當中有政總員工因為上班受影響而嚎啕大哭，片段似要突顯佔中對民生構成影響。然而，有眼利網民卻發現當日無綫播出新聞片段中，有疑似是臨時演員男子，其中一名被起底是曾拍無綫劇集及電影《Laughing Gor之潛罪犯》的臨記黃海權，屬天王影視製作旗下。由於天王影視是無綫合約臨記公司，關係千絲萬縷，令網民質疑有人跟政府聯手，請臨記到政總演戲扮返工做大龍鳳維穩，更指臨記價高達1,000元。
■無綫新聞大前日播出員工到政總上班受阻片段，被網民發現臨記黃海權現身，其身後兩男子亦疑是臨記。電視圖片
■黃海權曾在電影《Laughing Gor之潛罪犯》內，與吳鎮宇及林雪等人飾演囚犯。劇照
■黃海權曾與天王影視老闆老三及無綫藝員出席活動。互聯網圖片
■昨日網上流出疑是企政總的臨記日薪價目表。
互聯網圖片
拒出示證件
記者昨致電黃海權，對於被質疑收錢做戲，他說：「梗係唔係啦，我返工呀！個個都有好多份工返㗎啦，我嗰日係返保安，佳定保安，外判咗畀佳定吖嘛。你講嗰啲搞搞震嗰啲我唔做，我做番真係做嘢嗰啲，保安、拍嘢，你話去搞乜嘢收錢、反佔中我唔做，因為我自己有個宗旨，如果我俾人請去，我入唔入到去先？嗰度係要有證件先至俾入去，我由得你哋啲人點講，我行得正企得正。」
黃海權聲稱數年前在康文署的政府工退休後，便考獲保安牌照，當臨時保安和臨時演員，沒有固定職業，他指政總臨時保安日薪700元，較一般日薪500多的臨時保安及日薪300多元的臨時演員高得多。被拍下片段當日，正是他第3日到政總上班，但他聲稱現已不去政總返臨時保安，黃海權說：「點解冇返？我見到你哋咁樣去搞，容乜易畀你哋係咁煩我？我聽到長毛（梁國雄）又話check我，俾人影晒相，有錢都唔返啦。」
曾是無綫臨記帶隊的黃海權，聲稱無綫工作太辛苦，所以有近一年沒為無綫拍劇，近年只偶爾拍電影及做保安。問對佔中事件睇法時，他說：「政治我唔識，我只係覺得我要搵食。」不過，當記者建議他出示保安證明文件，黃海權卻一口拒絕，又表示跟當日同行兩名疑是臨記男子並不認識，只知道他們同是臨時保安。
令臨記蒙羞
對於被質疑搵黃海權到政總扮返工，天王影視老闆老三昨竟聲稱黃已離職一年多，世事何其巧合！老三說：「黃海權已經唔係我公司員工，呢件事我哋冇正面參與任何嘢，佔中又好，反佔中又好，我哋都不便置評。」網上流傳天王影視招募臨記反佔中，老三否認說：「我冇落order做呢件事，工作範疇只係同TVB合作。」老三更否認與政府聯手做大龍鳳：「絕對唔會，我可以叫晒佢哋出嚟，由你哋去問佢。我哋真係冇參與，亦同TVB無關。」
採訪：魯吉
|
鍾意就快D Share啦！
|
|
|
