全城熱爆的娛樂八封新聞 & 時事趣聞 & 生活 + 趣聞
大美人林青霞唔經唔覺已經結婚廿年，仲喺周一（ 3日）正日慶祝佢 60大壽。嘩！真係睇唔出 keep得咁好嘅大美人，年紀有番咁上下喎！
話晒一生人得一次，青霞呢晚嘅裝備，可媲美婚禮。當晚喺半島酒店搞 party，請咗鍾楚紅、鄺美雲、梁朝偉、劉嘉玲同俞琤一班老友之外，佢仲換上 4套 Lanvin，總值超過 15萬，貴氣到呢！唔只咁，青霞話一生人難得見到兩次甲子（即係 60年），要紀念一下，所以趕出第二本散文集《雲去雲來》，深度分享佢人生所見所聞，仲爆唔少家事㖭，真係好大方呀！
寫書揭秘 青霞揀咗張多年前由楊凡操刀嘅靚相擺喺散文集，佢仲自爆楊凡教當時未夠 1歲嘅囡囡愛林唱歌，點知將「 Happy Birthday」讀成「 Habaday」，之後就成為佢同楊凡打電話嘅暗號。
廿年前，青霞指定要着 Chanel婚紗行禮。佢話自己去法國度身訂造之後，唔聽人講只試身一次，但收貨發現太鬆身，擔心到喊，最後喺婚禮前 3日，來回法國同美國改衫，好驚險。
大美人嘅書房打理得好整齊。青霞話婚前喺香港住嗰陣，從來唔睇書，婚後反而睇多咗。搬屋先發現啲書多過衫，多到成幅牆都擺唔晒。
青霞玩到半夜，返到屋第一件事就係上網寫感言，仲用「圓滿」形容佢嘅心情。
青霞話老公邢李㷧唔鍾意阿女買名牌，但生日咁高興，青霞換咗 4套晚裝，睇嚟之後又會成為三個女嘅收藏品。
梁朝偉同老婆拍住拖去生日 party，嘉玲仲喺微博讚青霞「渾然天成，傾國傾城，靈氣逼人」。
汽水廠特別訂造紀念版賀青霞生日，都幾有心喎！
