蕭若元大爆故友見血暈
蕭若元、李力持和王晶當年在電影上跟向華勝合作無間，三人均對向華勝離世感到可惜。蕭若元前晚主持網台節目《蕭遙遊》時，大談故友軼迭事說：「90年開始我幫向華勝監製咗一連串電影，《鹿鼎記》、《唐伯虎點秋香》等20、30部電影。我講幾樣有趣嘢，佢去夜總會，次次冇幾十萬佢就情願唔去，佢落去就係威，去派錢。」蕭若元又指向華勝自創明了打人招數「鬼仔無影手」，打人速度非常快，但就偏偏怕血，他說：「向生咁聰明，佢捉象棋係頭幾名，有時諗嘢諗到嘭一聲暈咗。有樣嘢好奇怪，一見到血就會暈倒，佢係打拳頭交㗎啫。」
蕭若元更指向華勝愛賭馬，他說：「千幾萬一日，重有好多外圍。幾萬銀一條Q，買4穿11，終於有日過咗三關，個銀碼已經係5、6千萬，再過落去就係幾億或者10億，邊有人會賠畀你？啲外圍佬都走晒佢買外圍，去到第三場，全港外圍佬玩神打揼腳要佢輸。」最後向華勝只過了三關。
李力持昨感激向華勝給予機會說：「佢從來唔會干涉我哋，《唐伯虎點秋香》、《國產凌凌漆》冇剪過一個鏡頭。佢為咗學拍戲，睇足咗年幾午夜場，睇觀眾鍾意乜。」為向華勝公司開拍《賭神》等多部電影的王晶前晚則說：「好愕然，佢病時我都一路有要求探佢，但佢唔係好想見人，最終冇安排我入去見佢。如果佢走得冇痛苦同安詳，都好過受痛苦。」
採訪：魯吉、鍾國仁
■蕭若元（左）為向華強（中）和向華勝製作過無數賣座電影。
|
鍾意就快D Share啦！
|
|
|
