掃呢頁CODE去手機

2014年12月25日 星期四

[壹週刊 - 1294] 梁詠琪 粉色女兒夢 梁詠琪,M1,




梁詠琪話已知 B女手腳較長,最怕她長大後又是高妹一名,「我真係發覺好難搵男友,跟我呢個高度已是極限,但老公仲要她打籃球喎!」

名氣生活

梁詠琪 粉色女兒夢

懷孕七個月的梁詠琪,一直都話未買過 B女的衫褲鞋襪,事關她朋友多,大部分已送上衫仔來做禮,二來她跟足傳統,阿女未夠七個月大唔好「鳩嗚」,終於等到今個月可以出山買買買,第一站是去飾物店 Pandora買首飾,「女仔應該著裙戴首飾,打扮優雅啲,最好一身粉紅色,所以我會鋪排一個粉紅色世界,等佢一出世以為呢個世界只有粉紅色,哈哈。」

母女裝

呆等七個月禁買期,踏入聖誕節,梁詠琪一早就想送 B女首份聖誕禮物,縱然嬰兒出世手仔會似節瓜未適合戴飾物,呢位媽媽都已急不及待要買,仲要是什麼都打孖上,話是母女裝喎,「我會諗定她長大會貪靚喎,不只飾物,連衫我都想好,如果一齊著母女裝出街都好 sweet。」

通常母女裝都比較 casual同 cute,但她堅持要高貴行先,「我呢個年紀無理由著得太 cute,到時要阿女襯番我。」她還好傳統話要以粉紅為主,「呢個係我一廂情願,但有朋友提醒細路仔可能喜歡藍色、黑色,將來可能鍾意著牛仔褲或男性打扮,咁我都可以接受嘅,最後都係佢自己著上身,都要跟佢嘅個人喜好。」

生女不單可當她公仔打扮,最正是梁詠琪的珍藏有人承接,這才叫她鬆一口氣,「我無家傳之寶,都係我啲手錶、首飾同手袋,哎呀!當時未知男定女時都擔心,老公送我的飾物、手袋點算?依家係女就有人接收啦,無晒問題。」講吓講吓,她才想起西班牙籍老公 Sergio的媽媽其實早有準備,「奶奶佢話會送自己頸上的一條鏈,係佢三個仔女出世時用過的手鏈仔,佢保留咗,話到時留給小朋友,歐洲家庭又真係對呢種首飾好有情感,要代代相傳。」

她揀了奶嘴、嬰兒車及山羊為 B女手鏈串飾,埋單盛惠五千多元。

另外她又選了聖誕串飾,話下年可跟愛女一人掛一個。

年底前賣出的童話故事串飾,價錢一半會捐出做慈善。

購物時遇到已是一仔一女的「書伴我行」基金會董事會成員劉清儀,兩人雞啄唔斷講細路經,對方更提議她買書仔串飾做慈善。

未有中文姓

跟西班牙籍老公 Sergio結婚後,梁詠琪三年內不斷努力,今年三十八歲終在年中得償所願,三個月後就在香港分娩。「我同老公都想用自然方式,順產同餵母乳,希望可以餵到無得餵為止;不過我最期待係老公抱住個女講故事,我亦計劃每晚在床上跟她講 bedtime story。」不過她笑言事先要去補習,「每晚講一個故事唔易,邊度有咁多題材?仲要學埋 BB歌,無理由唱流行曲,咦,我都有唱《花火》佢聽, melody係慢啲, BB聽得舒服,依家聖誕節,我就唱吓聖詩。」

至於胎教,梁詠琪話每晚她在肚上塗油時就是最佳時機,會講什麼語言?她哈哈大笑話:「老公唔喺度,我就講廣東話,老公喺度就講英文,我老公呀,佢就不斷 mauh mauh mauh錫佢囉,話等佢 feel到爹哋媽咪好愛佢呀。」

此刻甜到漏的她,擺明有女萬事足,只是她亦為改名而煩惱,「個女英文名唔急,我仲叫朋友一齊 brainstorm,反而中文名先要搞掂中文姓,我老公得西班牙姓,所以我唔知自己叫乜太。」

有 B在身的她反而成為廣告搶手貨,上月又做產前 DNA檢查代言人。

不約而同懷孕三個半月的梁詠琪及陳茵媺,在九月中齊以孕婦裝扮亮相𢱑銀。

奶奶(右二)沒什麼西班牙的坐月食療,梁詠琪便聽命於母親(左二)。

一向錫老婆的 Sergio,知道老婆有咗後,經常陪伴她一家四口散步。



鍾意就快D Share啦!