掃呢頁CODE去手機

2014年12月10日 星期三

[FACE - 394] 唱夜場 《老表》 Mario殺上廣州 張繼聰 K場自 high冧女 繼聰,張繼聰,MF,




雖然《老表》 Mario勁入屋,不過登台當晚,只得十多個觀眾伸手要張繼聰嘅簽名海報。

真面目

唱夜場 《老表》 Mario殺上廣州 張繼聰 K場自 high冧女

《老表》上月尾大結局,收視平均得 26點,最高收視位竟然唔係王祖藍或者郭晉安,而係張繼聰後樓梯啜爆王菀之一幕,衰衰哋都有 28點。

食住「 Mario」個勢,張繼聰早前殺到上廣州搵人仔。冇用「 CBB」(震波波) style唱歌,亦冇剝衫用個胸猜枚,現場觀眾撻極唔着,氣氛一般,張繼聰惟有一路 rap一路自 high!其實觀眾有冇反應唔係重點,最緊要係 6位數字騷錢袋住先!

同王祖藍份屬演藝師兄弟的張繼聰,連續在兩齣《老表》有重戲份,今次做大隻軟飯王 Mario,更加係開正張繼聰嗰瓣,有得騷肌又有得搞笑,仲要搵埋老婆謝安琪 BB客串咁有 gimmick,明俾靚位聰聰上。

唔肯猜震波枚

角色入晒屋,梗係要食住條水搵真銀上月 29日,張繼聰做完新劇《逆戰塘西》記招,即一支箭標上廣州一間大型 KTV登台。

一開場,司儀以《老表》「 Mario」介紹張繼聰出場,可惜觀眾反應唔算熱烈,掌聲亦顯得有啲冷落。到玩有獎遊戲時,現場觀眾起哄叫張繼聰表演用胸猜枚,但錫身 Mario話時間太早,一口拒絕。為咗補飛氹番觀眾,張繼聰 MJ上身,唱快歌〈 Gimme a break〉同〈火星文〉時,不斷大動作跳舞,又叫觀眾跟住跳,不過最後都係得佢自 high,台下完全零交流。

觀眾上台玩遊戲,張繼聰自動波舉 V冧女。

在場人士掛住食嘢傾偈,對台上張繼聰嘅表演冇乜興趣。

1粒鐘快閃

愈唱愈冇癮,張繼聰嘗試繼續搞氣氛,「廣東話你哋聽唔聽得明?使唔使用國語講多次?」台下嗌完「要」之後,佢又玩嘢話:「唔好喇,我國語唔得㗎!」終於引到觀眾勁笑。

任務完成,張繼聰最後再力 sell自己,「雖然音樂暫時唔會做住,但大家都可以睇我嘅戲,或者重溫番我以前嘅歌!」搞足 1個鐘,張繼聰派埋簽名海報準時閃人,坐中港七人車返大埔陪老婆。睇嚟張繼聰要向成日北上巡唱嘅 Kay BB請教下點搞氣氛喇!

海報以《老表》做宣傳重點,而 KTV門口(下)嘅大熒幕當晚不斷播住張繼聰嘅片段吸客。

謝安琪 BB為老公客串《老表》,可惜被網友批評佢太造作,尤其把聲更加係 chok到冇朋友!

網上圖片

四小強有乜做?

曾經被稱為「樂壇四小強」的張繼聰、張敬軒、王菀之同方大同,今時今日已經各有成就,可惜張繼聰宣布暫時唔再唱歌,惟有聽佢老婆唱頂住先

張繼聰

早前公開表明暫停做音樂,主力拍劇,現時同楊怡拍緊《逆戰塘西》做男一,早前亦同陳凱琳等拍完《四個女仔三個 bar》。

張敬軒

去年簽約英皇後,出碟之餘亦參與舞台劇,多線發展,今年 10月在紅館開了 3場演唱會,又推出大碟《 Morph》。

王菀之

在《老表》飾演粗魯歌手「林雪」入型入格,演技獲讚賞。另外亦有參加內地歌唱比賽《麥王爭霸》,在國內人氣急升。

方大同

今年專注做《 Soulboy Lights Up》巡迴演唱,先後去過內地、新加坡、台灣等,亦有替唔少歌手做歌,最近就幫薛凱琪錄新國語碟。



鍾意就快D Share啦!