掃呢頁CODE去手機

2015年1月23日 星期五

[忽然1周 - 1017] 胡漢清迫走 娘家拒收留 江希文痛哭:有贍養費就離開 江希文,胡漢清,MW,




淚長流

江希文曾透露自己與胡漢清一齊時,經常活在惶恐之中。上周六( 17日)她抱女外出時,面對記者採訪就爆喊話:「你哋(記者)跟住我,我仲安全啲!」

滾熱辣

胡漢清迫走 娘家拒收留 江希文痛哭:有贍養費就離開

月初本刊獨家爆江希文與比她年長十八年的資深大律師男友胡漢清分手兩個月,有傳江恃住有個歲半女 Natalie,即使分手仍霸住沙宣道億元大宅唔肯搬,實行挾女霸屋爭身家。近日胡大狀去了英國,至今仍未返港。

據知胡漢清日內將會返港報警,更會出信要求江希文撤離大宅。上周六( 17日),江希文獨力湊女去超市買尿片,終忍唔住向記者哭訴:「有足夠贍養費就離開。」

「江胡」恩怨發展至今,愈揭愈臭,近日更有江希文硬食粗口的錄音流出。至於與江希文關係向來甚好的江父,據知因不滿女兒𢱑爛塊面賴死胡家,更因此反目。對於女兒面臨無家可歸,日前江父終對本刊開腔說:「我哋間屋冇位!」江希文內外交困,境況淒涼。










江希文與胡漢清近日各自出招,雙方先後流出「被毆」照不特止,周三( 21日)再有新發展。

日內報警

現時身處英國的胡漢清,早前被爆遭刀柄所傷,因此打算日內回港報警。據知他今次回港,會對江下逐客令。同時胡日前再出招,透過友人直指江希文在訂婚前隱瞞情史。

超市發呆

當日江希文邊喊邊答記者,指自己連日來要應付很多事,感到好辛苦。而其可愛囡囡則在超市手推車上睡着。

爆出與胡漢清的分訊後,江希文自爆大宅冇再請傭人,因此她幾乎每日都要帶愛女到超市買餸。她說:「 7月開始已冇工人,請來請去胡生都話唔啱。」

爆粗錄音流出

一段江希文被一男人以粗口辱罵,長達兩分鐘的錄音聲帶流出,當中該男人說:「我仲 sorry?我 X你老母,你唔同我 say sorry……你老味!我劈 X死你。我同你老竇 say sorry, say條 X,我 X咗你先,跟住同你家姐 say sorry吖!」事後江希文亦承認當中女聲是她本人。

向記者爆喊

面對連日來與胡漢清隔空的指控,谷住谷住的江希文,終於忍唔住爆發,自揭先後套現兩份人壽保險作生活費。日前她湊住歲半囡囡外出到數碼港超市,她在停車場推住手推車,向記者劈頭第一句便說:「我好辛苦!」對於記者不斷的提問,她亦有問有答。

記:你知唔知胡生都有受傷?

江:我知單新聞,但我從來都唔知佢受傷,亦冇睇過啲相,佢講乜佢嘅事!

記:依家係咪日對夜對?

江:唔係,佢冇喺度好多日。

記:咁依家點樣發展落去?

江: I don't know,總之依家我只負責照顧 BB,希望有足夠贍養費就離開。但你知我同 BB啲嘢喺晒度,要安排得周詳啲先可以搬,所以暫時都住喺度先。

記:有冇朋友可以接濟你?

江:唉!我唔想搞到朋友。 

之後江希文推着女兒步向超市期間,突然悲從中來,雙眼通紅。進入電梯後,更加痛哭流淚,忍唔住爆喊說:「其實你哋跟實我,我反而安全啲!啲朋友都叫我留番喺度,始終 BB太多嘢!」之後問到她再留在胡家大宅,驚唔驚影響小朋友?她再以紙巾拭淚,並說:「驚㗎!但 BB好乖,見親我喊就同我講:『 OK啦,媽咪。』」其後匆匆走入超市,再沒作任何回應。

死守胡宅

江希文和女兒每日依舊住在胡家大宅,她更對記者表明,要得到足夠母女日後生活的「贍養費」,才會離開胡宅。

辣埋江欣燕

在流出的爆粗錄音中,一男子對着江希文機關槍式爆粗,指不會和江欣燕搭同一班機到英國,其間江更被淋水。

老竇決絕

江希文透露擔心遭趕出胡家大宅,兩母女便冇容身之所。周二( 20日)記者就此事訪問江父,他竟然說:「我哋間屋冇位,之前有鼠摸(小偷)入屋,其實呢邊仲危險!」言下之意,拒收留江希文。

我哋間屋冇位!(真實對白)

江家汀九獨立屋

未註冊分唔到贍養費

胡漢清與江希文雖已育有歲半女,但資深律師黃國桐表示,名義上未註冊,也稱不上是夫妻,所以江希文應得不到贍養費。「根據撫養及生活津貼條例,法庭一般都會批出生活費俾個小朋友,但就唔屬於贍養費,因為佢哋冇註冊。自 1970年以後,法例已經冇咗『事實婚姻』呢樣嘢,即係冇註冊就唔承認呢段關係,係保障唔到女方,不過冇辦法。」

有指江希文強行霸佔胡家大宅,胡漢清可否出律師信趕她走?黃律師表示:「當初的確係個男方俾女方入住,係另一個要拗嘅問題,相信法官會從細路仔角度去考量。」

曾勸江希文回家住

江希文和胡漢清拍拖期間曾試過「夫妻齊心」夾擊胡老太。江希文更為胡誕下女兒,可惜二人到頭來都以分手鬧劇告終。

本刊收到消息,一直未有開腔回應的胡漢清,日內便會返港就他受傷一事報警,更打算出信要求江希文搬離大宅。據知家境不俗的江希文在去年九月,與胡漢清爆發衝突期間,曾向胞姐江欣燕求救。在江欣燕穿針引線下,急晤律師商量對策。當時江父亦試過做和事老,與胡漢清傾談過,又表示不介意女兒和孫女回娘家住,但遭江希文拒絕。「其實 Liz(江希文)屋企住汀九獨立屋,屋企大把房。 Liz母女要返屋企住,絕對唔係問題,而江父一直幫 Alan(胡之洋名)同 Liz做調解員。之前佢哋兩公婆有少少嗌霎,江父都勸家和萬事興,夫妻間要互相遷就。直至舊年 9月佢哋鬧分手,喺屋企掟晒嘢,江父知佢哋應該冇彎轉,就勸 Liz帶埋個孫女返娘家住,反正 Liz父母閒時都係去跳吓拉丁舞,可以幫手湊孫。加上欣欣(江欣燕)同 Liz感情超好,當呢個姨甥女好似自己生咁。」知情人透露:「但 Liz唔甘心,雖然佢同 Alan未註冊,名義唔算夫妻,但始終佢哋生咗個女,生活費點都攞到啲!況且間大宅市值成億,佢認為 Alan會念在個女份上,點都會分到啲嘢,所以死都唔肯走,走咗就渣都冇。」

招招狠

江希文 VS胡漢清

月初,本刊率先踢爆胡漢清和江希文兩年情玩完,二人隨即招來招往,互揭瘡疤,互爆陰私,雙方各執一詞各自對外發放瘀傷照。日前更流出一條爆粗錄音,似乎雙方對攤牌早有部署,秘密殺着相信陸續有來!

胡漢清兩段婚姻撻 Q收場

現年 63歲的胡漢清,與江希文訂婚前,經歷過兩段婚姻,但均離婚收場。

張天愛

92年結婚,並在蘇格蘭註冊,其後分別在倫敦及香港豪擺百萬婚宴,可惜婚姻僅維持 3個月,女方最終提出離婚。張曾在訪問中,表示這段婚姻不提也罷。

《蘋果日報》圖片

余慧敏

99年胡再娶模特兒余慧敏,婚後育有兒子 Archie和女兒 Magdalen,兩人於 2008年宣布離婚,之後更一度為家產鬧上家事法庭,最終庭外和解。

母親激到病

女兒是非搞到滿城風雨,湊巧是江父透露太太近日生病。周三( 21日)江父陪太太往荃灣執藥時,二人表現憂心忡忡,江母更比上周消瘦,我見猶憐。

江母挺身撐女

江父冷對細女江希文,但江母就心繫江希文。日前她專登去胡宅陪江希文送歲半女返 playgroup。

去年和諧共聚

去年六月,剛誕女兒的江希文,由英國返港。當時她與胡漢清關係尚算不錯,特別安排胡和娘家一家聚餐增進感情。而胡亦對女兒寵愛有加,食飯時一直抱到實。

心淡落閘

對於胡漢清和江希文的瓜葛,身處加拿大的胡老太一直沒有表態。而其好友白韻琴就直指冇睇好胡的婚姻,又說胡老太當冇咗個仔。《蘋果日報》圖片

眼見女兒執迷不悟,即使𢱑爛塊面,未肯搬離胡家,江父去年尾發電郵給胡漢清,表明不會負責孫女起居生活。知情者續說:「 Liz同爸爸為咗呢件事嘈,江父本身錫到兩個女燶。嗰時欣欣離婚,江爸爸即刻去做埋司機幫欣欣搬嘢返屋企一齊住。今次件事一樣,江父覺得點解 Liz要作賤自己,個男人都已經唔愛你,你仲賴死唔走,佢覺得個女唔抵爭。」

江父今次講明唔准屋企任何人接濟江希文,要她反省。因此一向與細妹姊妹情深的江欣燕,連日來亦「潛水」,不過江母始終不忍心,不時到胡家大宅探江希文,順道湊可愛孫女返 playgroup。

周二( 20日),江父離開汀九寓所,接受本刊記者訪問,坦言最近沒有搵過江希文,更說:「我哋間屋冇位(俾佢哋住),佢哋返嚟都係瞓廳。(咁大間屋都冇地方?)唉,大女又有衣帽間,又有 office,所有房都用晒。近排又有鼠摸(小偷)試過爬入嚟,呢度仲危險呀!(有冇嘢想同江希文、胡漢清講?)唉!搞到滿城風雨。我唔贊成佢哋兩個再搞嘢。佢哋兩個最好就收聲,佢哋收聲就一條龍,大聲就一條蟲。」江父對細女冷淡,反而他在訪問中,再三要求記者不要追訪江欣燕,明顯緊張大女。

一對情侶緣盡分手好平常,但落得互揭瘡疤,爭做受害者,只會丟人現眼。成件事最無辜的,始終是小朋友!

貴價 Playgroup

江希文囡囡 Natalie入讀的香港國際蒙特梭利學校位於上環文咸東街分校的 Montessori Playgroup班,僅供 1歲至 2.5歲小朋友就讀,一星期返 3堂,學費為$6,500,屬名牌學府。課程主要以英語及普通話教授,亦必須由家長一同上堂。學校採用的蒙特梭利教學法在外國甚出名,具國際性,把抽象概念變為具體、把複雜化成簡單。此校亦是本港首間獲美國國際蒙特梭利議會認證的蒙特梭利國際學校,邱淑貞三女沈日亦曾就讀。



鍾意就快D Share啦!