掃呢頁CODE去手機

2015年1月23日 星期五

趙雅芝碌發哥人情卡省靚黃愷傑星途 黃愷傑,周潤發,發哥,趙雅芝,

趙雅芝愛錫兒子黃愷傑,若有需要,會找好友周潤發幫手。


趙雅芝碌發哥人情卡省靚黃愷傑星途

娛圈模範夫婦黃錦燊與趙雅芝,昨日與兒子黃愷傑亮相娛樂集團發布會。身為大律師的黃錦燊出心出力出資,做娛樂公司股東,發展電影製作。黃愷傑獲公司力捧,擔正兩部電影男主角,媽咪趙雅芝則揚言有需要會碌「許文強」周潤發卡,以助兒子及公司打響內地知名度,為乖仔擦亮星途。

黃錦燊、趙雅芝、黃愷傑(Wesley)、楊受成、陳欣健、許冠文及樂易玲等昨日現身尖沙咀,出席國奧亞洲電影計劃戰略發布會「From Boy To Man國奧首映禮」,黃錦燊與陳欣健均為國奧股東之一。大會除公布一系列發展計劃外,更隆重其事介紹旗下藝人黃愷傑出場,大讚他大學畢業後專誠修讀電影相關課程,對演藝工作充滿熱誠,而國奧籌備中的四齣電影,兩部有Wesley演出,國奧更向Wesley送贈一艘紙板遊艇,可見非常重視這位實力及外形兼具的「星二代」。

黃錦燊只負責製作

萬千寵愛在一身的Wesley,被傳媒要求與父母合照,但遭黃錦燊婉拒。Wesley說:「可能爹哋想我靠自己,我由細到大,佢都教我要獨立。(做星二代壓力大?)還好,大家當初認識我,可能因為我父母,但我都有畀心機工作。(你爹哋想力捧你?)唔係,佢負責電影製作嗰邊,係內地股東想簽我。(以後接工作,爸爸會畀意見?)唔會,佢畀我同經理人自己做決定。(公司送『遊艇』又開戲畀你?)我都係綵排先知。」他於兩套戲《新兵正傳3:蛙人傳》及《我曾路過你美麗》均做男主角,問怕不怕被指靠父蔭?他稱:「唔會,佢有佢做製作,我有我做藝人。」

黃愷傑外形俊朗,絕對有潛力紅遍中港台。
  • 黃愷傑外形俊朗,絕對有潛力紅遍中港台。
周潤發貴為影壇巨星,若與黃愷傑合作拍戲,必令後輩星途更易發亮。(資料圖片)
  • 周潤發貴為影壇巨星,若與黃愷傑合作拍戲,必令後輩星途更易發亮。(資料圖片)
股東黃錦燊(右起)、陳欣健、吳文侯、王鵬、于洋為活動主持亮燈儀式。
  • 股東黃錦燊(右起)、陳欣健、吳文侯、王鵬、于洋為活動主持亮燈儀式。

黃錦燊否認拒與兒子合照為免被指搶鏡,他說:「唔關事,今日咁多人。(做股東為培育個仔?)唔係,我負責管理製作,係內地股東想做埋藝人管理,我都唔熟,交晒畀于洋(另一位股東)處理。」

黃錦燊拒與兒子合照,故黃愷傑只與母親趙雅芝及樂易玲影相。
  • 黃錦燊拒與兒子合照,故黃愷傑只與母親趙雅芝及樂易玲影相。
「國奧」昨日舉行發布會,楊受成(中)亦獲邀出席撐場。
  • 「國奧」昨日舉行發布會,楊受成(中)亦獲邀出席撐場。

趙雅芝則聲言願為兒子碌人情卡,她說:「我知國奧有好多電影大計。(會請周潤發合作,幫個仔打入內地市場?)如果有啱嘅,我會搵發仔呢個朋友,如果需要到我去打呢個電話,我一定會幫。(高興囝囝被力捧?)我精神上支持佢,作為新人要努力,將壓力變為動力,希望大家支持佢。」

陳欣健讚條件優厚

另一位股東陳欣健則說:「黃愷傑係公司嘅年輕一代,將遊艇送畀佢,希望佢發展一帆風順!(點解簽黃錦燊個仔?)佢有好好嘅條件,唔可以話係partner個仔至簽。有股東想成立藝人部,佢又鍾意Wesley,同黃錦燊傾過,佢個仔冇經理人,我哋香港同內地嘅經理人配套做得好,好有信心捧佢。佢目前係公司唯一藝人,我哋會力捧佢。」

文:影視組



鍾意就快D Share啦!