本月 12號落選亞姐陳沛鈺向本刊哭訴，去年底曾被人迫去飯局。
滾熱辣
錄音鐵證迫陪客三日 落選亞姐陳沛鈺哭訴：感到極度困擾
年近歲晚，亞視醜聞一浪接一浪。拖糧未解決之際，本刊獨家踢爆「星光幫」嫩男梁景煌及姜皓文，遭老闆王征公器私用，一個要陪瞓一個被抽水。男藝人要陪老闆，而女藝人則被安排北上陪客，令人側目！
繼亞視嘟姐筱靖爆大鑊︰「我唔肯（陪客），結果續約時亞視話一分錢都唔會加俾我！」後，應屆落選亞姐陳沛鈺（ Sanna）亦企出來，大爆亞視藝員科先後兩次來電，迫她去船Ｐ及北上陪客。在本刊收到的數段 WhatsApp錄音中，陳沛鈺連番拒絕，但對方卻軟硬兼施，令她感到極度困擾。今年剛滿廿歲，入世未深的她，面對世途險惡，感到委屈兼激動落淚。
陳沛鈺去年選亞姐，一心借選美晉身娛樂圈，演戲、主持雙線發展。由於她與影帝周潤發家姐周坤玲熟稔，參選時被起朵「發哥世姪女」。可惜，在亞視要紅，就要付出代價。
參選後，陳沛鈺三甲不入，與亞視的臨時合約要到去年 11月才完結。落選後不久，亞視藝員科的亞姐保母 Jonathan竟然打電話給她，叫她去船 P，更表示已約好了「星光幫」、亞洲先生及亞洲小姐一齊上船。
陪客要過夜
「咁耐都未試過話要同客食飯嘅！ 29號打嚟， 30號就要上清遠，仲要去三日兩夜，猛話唔夠女仔，叫我點都要去。我愈諗愈驚，心諗上到去有乜唔妥，想走都未必走得到。而且佢話上到去係第二個同事帶我哋去，但又講唔到係邊個。」
為免得失亞視，陳沛鈺就推說要做普通話電台節目，撞咗期去唔到。豈料 Jonathan即刻大大聲向她訓話，更指拒絕飯局有違約之嫌，迫她就範。
陳沛鈺跟對方強調，同亞視的臨時合約已在去年 11月完結，「呢件事令我感到極度困擾。後尾佢查到我同亞視冇約，即刻再打嚟，語氣軟晒，話公司好希望我幫到手，幫咗公司，公司會記得你嘅。」
談到被迫陪客，陳沛鈺一臉委屈，眼濕濕話︰「我問佢做乜一定要我去？我都冇簽約，點解唔叫簽咗約嗰啲女藝員去。佢猛話唔夠女仔，叫我幫吓手，後尾我知道其實都有好幾個亞姐去咗。」
陳沛鈺說之前有同屆亞洲小姐提醒過她：「『你咁細個（剛滿 20歲），提吓你啫，你去得就預咗如果你唔制就唔好去嘞！你諗吓就知乜事』又係喎！正常陪客食飯，點會今日通知聽日出發㗎？我係想上位，想喺呢行發展，但咁樣上大陸，一啲安全感都冇。
「其實好多人都覺得娛樂圈條路可能好易行啦，做啲交易就行到，好多人都咁諗㗎，但咁可以做幾多次呢！」陳沛鈺說到這裏，激動到眼濕濕。
王征搞亂檔
其實王征入主亞視後，強行將亞姐的「仁美清敍」進行「商業化」，要求「仁美」會員北上陪政要，間接令「仁美」主席黎燕珊同亞視「分手」離場。昔日大家為免得失權貴，對王征敢怒不敢言。隨着醜聞愈揭愈多，「亞視嘟姐」筱靖、 08年亞姐亞軍顏子菲，連應屆亞姐陳沛鈺都無懼站出來指證，但王征卻一直拒絕回應。而亞視執行董事葉家寶被本刊問及有關活動時亦推說忙，稍後回覆本刊，但對於是否迫亞姐出席，則沒正面回應。香港仍有黑白真理，權貴要隻手遮天？未成氣候！
局陪客錄音精采節錄
去年底，陳沛鈺收到亞視藝員科職員 Jonathan的 WhatsApp錄音，要她去清遠陪客吃飯，當陳沛鈺拒絕時，對方軟硬兼施。
陪客苦主挺身爆
除了落選亞姐陳沛鈺，其實不少亞視中人都是「被迫陪客」的苦主，若要守身的話，就要忍受低廉的薪酬甚至遭雪藏。
顏子菲
試鏡變陪客
在亞視期間，亞視曾多次以 casting為由，安排一些工作給顏子菲，實則這些工作其實是招呼來賓的飯局，仲要求她陪埋唱Ｋ，與她心目中所想的完全不同。
筱靖
拒飯局離巢
筱靖早前公開爆料，指去年 3月跟亞視傾續約時，因為她曾經拒絕出席一個由王征親自點名的派對，結果亞視表示「公司唔會加一分錢俾你」，最後筱靖決定離巢發展。
袁文傑
被王征睇中
離開亞視 3年嘅袁文傑，是亞視第一批接觸王征的藝人。他指王征第一次見面已經揸手求約會，仲傳紙仔給他。之後來到香港，幾個人同枱食飯，王征竟然用短訊約他上房。雖然袁文傑拒絕應約，仍然獲得王征「賞識」加人工，但佢覺得亞視已經變到怪怪哋，最後決定轉投 now。
|
鍾意就快D Share啦！
|
|
|
