晒 34C身材
筱靖擁有 34C弗爆身材，加上輕擺蛇腰，十分養眼。
滾熱辣
我要做咖啡女王 筱靖撇亞視盡地一剝
「亞視嘟姐」筱靖（ Manecy）在亞視捱足七年，曾仆心仆命撐亞視國民教育及反對發免費電視牌照。不過去年亞視拖糧，她講了句良心話「出糧係天經地義」，便遭亞視雪藏。筱靖對此心灰意冷，近日更提出解約，從此各行各路。
筱靖家族從事食品生意，一年生意額達五億人仔，去年更接手捷榮咖啡的內地代理權。身為家中長女的她，決心全力接手咖啡生意，向「咖啡女王」之路進發。
筱靖的爺爺陳培，有「酵母之父」的美譽， 2013年更獲中央頒發終身成就獎，表揚他將酵母引入中國。其家族「利德統一食品原料」在行內聞名，旗下門市「金莎餅店」，全國分店逾三十間，每年生意額達五億。
至於香港的捷榮咖啡，市場佔香港餐廳八成。近年香港捷榮銳意打入內地巿場，可惜未如理想，去年遂主動找筱靖家族傾合作，雙方九月達成協議。筱靖表示家族接管捷榮咖啡內地代理權後，未夠半年營業額已達半億人仔。
屋企有米，難怪筱靖在亞視月薪只有七千，但依然住大埔別墅式單位，出入揸 Benz。不過去年尾她被亞視雪藏，心灰意冷，加上父親開聲，令她決定接手家族生意。
月使 50萬
筱靖說：「我今年都三十，覺得要有個轉變。老竇同我傾，講明如果咖啡生意做得好，會有錢同股份俾我。最重要係我鍾意飲咖啡，所以都想試吓，現時接管公關及宣傳工作。」
家族有財有勢，筱靖為何要屈就亞視 7年？「我係長女，三代都得我一個女，屋企都好寵我，我想做乜就做乜。加上自己好勝，原本爺爺唔想我入行，當年（指 07年）佢俾咗 50萬我，叫我炒吓股票學吓嘢。結果我一個月內 shopping用晒啲錢，於是佢都覺得我係要捱吓。」
亞視 4宗罪
筱靖一直撐亞視，換來只是月薪七千，去年更是「零加薪」，最終被雪藏。筱靖直指亞視對她涼薄。
第 1宗罪：攞員工着數
筱靖在亞視七年，只加薪一千。但亞視搞台慶等活動，卻要她多次「買枱」支持，每次以數萬元計。她說試過有節目要她贊助禮餅，但節目出街時連鳴謝都冇落。
第 2宗罪：無故雪藏
舊年亞視拖糧，她講了句「出糧係天經地義」，便遭公司雪藏。事件被傳媒報道後，亞視即與她言和，但之後又再雪藏她。
第 3宗罪：局貼錢打工
她出埠拍外景時，試過因為劇組冇錢，她要先墊支工作人員的酒店錢。她又試過半夜被通知翌日上午到北京出席活動，要她出錢買機票，機票錢更追了年半才收回。
第 4宗罪：逼講大話
2012年亞視投資者王征在政府總部跳「騎呢舞」反對發免費牌照，她擔任大會司儀，要她埋沒良心反對發牌。其後亞視為盛品儒離職而示威，亞視又要她盲撐。
密謀內地開 café
即將投入商界的筱靖，現在已滿肚密圈：「家族做食品原料同做餅，我哋有諗過開 café，希望做到一條龍服務。捷榮喺香港有八十三年歷史，不過在內地就初起步。內地文化以飲茶為主，咖啡屬於新興及年輕嘅嘢，要慢慢嚟，呢方面我哋 handle到。不過我依家都學緊，邊學邊做啦。」
雖然一心搞生意，不過在內地從商，有知名度着數好多。筱靖銳意建立性感形象，要來個「終極一剝」。她說︰「內地人覺得你有人氣，點都唔會『搞亂檔』整壞個名，對你自然有信心。之前出席亞視嘅內地活動，內地人唔多識我，只知我係主持。佢哋話香港主持之中，只係識嘟嘟（鄭裕玲）。現場即有人話我係『亞視嘟嘟』，內地人立即另眼相看，嗰一刻令我體會到名氣嘅重要。」
保名氣從商
「之前我同老竇去同捷榮傾生意時，我都有表示過想做捷榮內地代言人。捷榮高層好婉轉咁話，佢哋已有陳豪做香港代言人，內地都想搵個差唔多嘅藝人做。人哋咁講，我即刻明喇。」貴為太子女都冇得為旗下產品代言，難怪筱靖要行性感儲人氣。
問到怕唔怕性感形象影響她做生意，筱靖反說：「我又唔係要做偶像派，啲相我覺得靚就可以我只係想俾人覺得我喺娛樂圈經營自己事業嘅同時，喺商界都有啲作為，想做女強人。」
|
鍾意就快D Share啦！
|
|
|