掃呢頁CODE去手機

2015年2月5日 星期四

[壹週刊 - 1300] 財可通神 周星馳數口精  500萬植入女配角 周星馳,M1,




探熱針

財可通神 周星馳數口精  500萬植入女配角

周星馳新戲《美人魚》去年九月大鑼大鼓搞女角招募比賽,玩完一場大龍鳳後,由貌似舒淇的十八歲新人林允擔正做女一;要獲星爺垂青,樣貌身材是考慮因素外,有錢一樣行得通。據了解,其中一名參賽者徐軫軫,便是有後台以五百萬投資金,換取她做其中一條美人魚,角色當植入廣告,話咁易,又賺一筆。

豬八戒掂咗

唔想俾你估到!周星馳新作,二○一六賀歲片《美人魚》女主角人選不斷變,由大熱許雅婷、松岡李那到最後由模特兒出身,簽埋賣身契的 34B林允擔正,至於參加招募比賽唔過關的落選者,原來仲有其他方法,可以有機會在電影出鏡。

「而家有份做其中一條美人魚嘅徐軫軫當日都有參加招募比賽,當初仲傳過佢係女一人選,不過佢個樣始終唔及林允咁特別;但佢有班朋友識得星爺,有人俾錢投資部戲,所以軫軫就算落選,都可以有個角色。」知情者說。

據了解,徐軫軫以個人身份投資五百萬換一個角色,戲份唔多,甚至隨時只在電影中閃過,但以錢換角的做法,在內地絕非新鮮事。一二年周杰倫、謝霆鋒合作的《逆戰》,女主角林鵬的植入價便高達六千萬人仔。

「投資五百萬都係冇話事權,就算拍咗好多場戲,最後都要睇星爺點剪,不過佢哋又唔會介意喎,好似之前部《西遊•降魔伏妖》入面做豬八戒個陳炳強,戲份好少,但拍完部戲之後多咗人識好多 job,而家已經有幾層樓揸手,所以最緊要係泊到星爺個碼頭。」

植入女配角

徐軫軫

當日有份比賽的香港女藝人,只有寸嘴 Barbie(左二)及松岡(右一)有得留低。

比賽當日,徐軫軫(左二)跟林允(右三)都要著住三點式大騷身材。

松岡未參賽前,已經有份參加星爺深夜船 P,之後更升呢成為新片第二女角。

捧自己友

一如過往,擔正女主角的林允,已簽約星爺旗下公司,肥水不流別人田。

「星爺覺得林允比軫軫可塑性高,十八歲又似足舒淇,個樣可以好細亦可以好成熟,最重要係林允冇經理人,可以簽俾星爺間經理人公司。其實當時松岡李那真係好有機會,但可惜佢本身有經理人,唔係星爺心目中盤數。」知情者說。

星爺大讚舒淇坦白可愛,更曾公開追求,不過最後都係遭舒淇拒絕。

有指林允跟舒淇氣質身形相似,最後獲星爺垂青。

《美人魚》男主角一樣不斷換人,最後由鄧超孭飛,拍攝期間,他跟林允經常在片場玩自拍。

周秀娜有機會在《西遊•降魔伏妖》演出,戲份雖然不多,但在內地知名度大增,之後一直唔停接拍電影和電視劇。

星爺在《西遊•降魔伏妖》教戴住豬頭套的陳炳強演戲,一樣有交流。

豬八戒真身陳炳強。

「星」閃閃

周星馳的電影,哪怕是一個小角色,戲份再少,一樣可以彈出上位,由冇到有。

石榴姐苑瓊丹 隱形富婆

03年與周星馳合作電影《唐伯虎點秋香》,苑瓊丹憑「石榴」一角,近十年在內地密拍電視劇賺人仔,住獨立屋揸跑車,是娛樂圈隱形富婆。

如花李健仁 繼續有得撈

跟星爺是同學的李健仁,本來一直做電影幕後,得星爺賞識,有機會在電影扮演挖鼻屎不男不女的「如花」後,「如花」成為醜女代名詞,近年雖未有跟星爺合作,但他在內地繼續有戲拍,依然有錢搵。

包租婆元秋 攞埋獎

息影十八年的元秋, 04年復出在《功夫》飾演「包租婆」一角,除為她贏得金馬獎最佳女配角外,之後繼續以惡死包租婆形象拍電影拍劇,賺到盡。

鍾意就快D Share啦!