掃呢頁CODE去手機

2015年2月26日 星期四

[壹週刊 - 1303] 寸繼母 拒做真人 show 洗米華獨子離隊 洗米華,M1,




Mandy曾做人肉坐墊陪洗米華賭百家樂,近日洗米華和妻女遊日,他卻化身肉墊讓華嫂坐到實,更嘟嘴扮可愛攬着老婆,難怪華嫂展示勝利笑容。

探熱針

寸繼母 拒做真人 show 洗米華獨子離隊

一向標榜家人同心的華嫂陳慧玲,新年期間與老公洗米華(周焯華)舉家到日本旅行,贏回小三 Mandy Lieu一仗。至於早前和她吵大鑊、在 fb爆 seed的大仔周柏豪(周焯華前妻所生),就企硬唔肯參與晒恩愛真人騷。

擺明對着幹,華嫂拖老公遊日同期,周柏豪校啱時間,跟同學去捷克和奧地利玩,擺明車馬,寸繼母!

做肉墊氹正印

佗住六個月肚的 Mandy Lieu,陪完男友周焯華到柬埔寨傾生意後,又拍拖到曼谷旅行,極度得寵。但新年大時大節,就輪到正印出場,華嫂 mark實老公,舉家坐私人飛機去日本晒恩愛。周焯華不但為她做人肉墊,又嘟嘴、面貼面影相,煙靭相再離奇在網上曝光,華嫂威番次!

但今次日本賀歲團,卻獨欠長子周柏豪。原來在英國讀書的柏豪並非沒有假期,只是早前同華嫂吵鑊,條氣未順,唔想再客串做真人騷。

早前柏豪同華嫂嘈完交,曾一度在 facebook耍冧,表示自己太衝動和幼稚,應更有耐性同家人溝通。他更 tag埋華嫂署名 Heidi Chan個戶口,表面俾足面她。

但當華嫂好友、陳山聰阿嫂 Sophie搭嘴時,剛道完歉的柏豪似乎唔多順氣,反駁需要家人跟他暢所欲言,有效果地溝通,他預備好了,希望家人都能。

由於之前曾同華嫂鬧意見,洗米華獨子柏豪今次罕有離隊,同期卻去了捷克旅行。

開完拖唔順氣

「雖然柏豪唔係華嫂親生,但華哥好少時間喺屋企,平日都係華嫂話事,所以柏豪好聽佢話。但之前因為好小事,華嫂同佢嘈咗次,雖然柏豪喺 facebook認錯,話自己太衝動同幼稚,但佢條氣其實唔順;華嫂好友、陳山聰阿嫂 Sophie留言幫口,柏豪都忍唔住寸嘴話希望家人坦白同佢溝通。舊年聖誕一家人去泰國旅行嗰次,柏豪唔小心喺 instagram洩露行蹤,華嫂鬧過佢,所以佢今次更加唔想一齊去日本。」知情人說。

唔願埋位做真人騷,柏豪約埋同學及新女友去捷克和奧地利滑雪度歲,更將旅行相放上網,習慣每年都返幾次澳門的他,更表明今個新年不返澳門。

嘴不停

洗米華在日本不停嘴住華嫂影相,連在便利店門外都要攬住老婆錫額頭,彷彿回到初戀時,交足貨!



面貼面擺甫士, sweet到呢!這些機會……是屬於華嫂的。

洗米華有風度地為家人擔遮,不過主要遮華嫂和女兒周梓潼,周爸爸主要交由妹妹照顧。

一家人著和服開餐,洗米華十分風騷。

捷克和奧地利之旅不愁寂寞,柏豪全程都有新女相伴。

柏豪去咗捷克布拉格玩,湊熱鬧在街頭學玩「拉」大型肥皂泡。

似老豆

擁有多張賭枱,是澳門廳王的周焯華是香港上市公司太陽國際集團老闆,沾手生意包括電影唱片、礦業、財務、地產、金融……也是甲組足球隊太陽飛馬班主,瓣數多多。去年,他看準大馬市場,先在當地開設「左麟右李雲吞麵店」,並計劃與新世界集團合作,開拓當地的地產業。

周焯華與前妻所生的兒子周柏豪,亦甚有生意頭腦,在英國讀中學的他跟同學成立廣告公司,並在當地推出留學生優惠 Apps。

拍四太食大茶飯

「兩母子」有拗撬,但周焯華卻無時間做和事老。由於中央打貪,澳門賭業吹淡風,要睇住個壇的周焯華於是不斷將業務向外發展。近期更有傳他與四太合作,準備在緬甸、俄羅斯和蒙古大展拳腳。

「四太本身喺緬甸有搞開賭業,有晒人脈,華哥有機會同佢合作,自然方便好多。俄羅斯同蒙古係新興市場,預計一開賭就會吸引好多客人,雖然蒙古未開始正式發賭牌,仲係研究階段,但華哥同四太已經密斟,睇得好緊;仲有日本都打算放寬賭場生意,華哥好有興趣,所以佢要周圍飛。」知情人說。

大時大節,洗米華必定識做交人,跟妻女遊日時更顯得心情甚靚。

放咗幾日歐遊相,柏豪放華嫂同細妹合照上 ig補鑊,但就表明今年不回家過年。

舊年聖誕,柏豪同華嫂、妹妹等去泰國玩,但他不小心洩露行蹤,令華嫂不快。

在英國讀書的柏豪,於學校人緣甚佳外,近期更同新女交往甚密,不但在英國孖住夜蒲,更一齊去奧地利和捷克玩。

小三夠體面

出埠傾生意,周焯華總是帶小三在身邊,因為 Mandy英、日、粵、馬拉話同普通話都流利,帶她出去應酬,亦夠體面。

「 Mandy大住個肚都幫手湊客,華哥欣賞佢夠野心,又覺得佢幫到手。不過佢成日爭寵,好似舊年華哥同華嫂歐遊,仲有今次去日本, Mandy都不停 WhatsApp佢,搞到華哥好煩。兩個女人都唔易應付,仲點得閒理柏豪同華嫂嗰筆!」知情者說。

四太最近同洗米華研究合作大計,孖住擴充海外賭業版圖。

早前 Mandy與洗米華去完柬埔寨傾生意,再去泰國預祝情人節,入住的酒店總統套房,正是洗米華與正印華嫂於去年聖誕時入住的同一間。

華嫂一直 keep住正印氣勢,除了在 facebook發潮文撐老公的賭業生意外,更不時大方晒

巨肚。

二月頭, Mandy頂住六個月肚都幫洗米華湊客,難怪咁得寵。

擴大賭圖

澳門賭業去年中開始倒退,生意難保,周焯華揸弗的太陽城娛樂早前借殼國際娛樂( 1009)上市失敗,但他未有被打亂陣腳,除了拍住四太梁安琪向外擴張版圖外,這兩年,亦先後在東南亞國家插旗;早前他更親自帶內地豪客到柬埔寨豪賭豪玩。柬埔寨有賭廳外,澳洲、越南、緬甸及新加坡等地同樣有經營賭廳,成日要周圍飛開會,巡視業務。

左右逢源

去年 12月爆出 Mandy Lieu跟華嫂都懷有「華種」後,要在正印與小三之間周旋的周焯華,經常人肉速遞兩邊走,兩邊都做到足。

小三遊台灣

去年八月開始, Mandy Lieu先後被拍到做跟得女友,陪男友坐頭等飛紐約傾生意,之後又孖住遊台北。

正印歐洲慶生

跟小三疏乎完,周焯華第一時間安撫華嫂,豪使五百萬包團坐私人飛機到歐洲為她慶祝生日。

Mandy收豪宅

跟周焯華親密關係曝光後,唔使做陪玩陪食的 Mandy Lieu更獲男友送億元豪宅及吉隆坡獨立屋。

放水老婆搞生意

Mandy頻頻收禮,華嫂亦有老公開水喉做生意,開果汁店、託兒所再做埋美容,乜都得。

全家人過聖誕

去年 12月底,華嫂拖實老公跟一對子女到泰國過火辣聖誕兼替老爺慶祝生日,不過周焯華交人唔交心,全程冷待華嫂。

離隊搵寵妃

心在小三,陪屋企人過聖誕後,周焯華即閃走提早離隊,飛新加坡陪佗女 Mandy。

柬埔寨糖黐豆

農曆年前,被拍到跟 Mandy在泰國度假和到柬埔寨傾生意,對佗住六個月肚的 Mandy,周焯華全程拖實,照顧周到。

做人肉坐墊

拖住大肚華嫂與家人飛日本過農曆新年,今次周焯華唔再 cool爆,兩公婆全程連體,經常互嘴,更化身人肉坐墊俾正印坐,大晒幸福。

鍾意就快D Share啦!