【晴報專訊】近日憑「哭腔」翻唱《傻女》而人氣反彈的李逸朗（Don），上星期接受陳國峰及王梓軒主持的《Big Boys Club》訪問，Don自爆曾在北京收取百多元人民幣為大廈外牆抹玻璃，但王梓軒竟「神算」上身：「一百多元一天，一個月也有三萬多！」此話一出即引來網民圍攻，狂寸他在美國康奈爾大學畢業，卻連這麼簡單的數也計錯，唔通有錢人真係唔識計呢啲細數？
Don上周二在TVB節目《Big Boys Club》中細訴一個人在北京闖蕩尋夢的辛酸史，又自爆每晚替大廈外牆抹玻璃賺取微薄生活費：「是高薪的，都有一百多元一晚，要生活，所以Keep住做。」
「一個月有300日」
但畢業於美國著名學府康奈爾大學畢業的王梓軒卻突然爆出一句：「一百多元一天，一個月也有三萬多！」當時陳國峰、Don及導演都沒有感到不妥，雖然Don已即時更正沒可能每天都有工開，但王梓軒仍窮追不捨：「你不會每天去不同地方洗嗎？」而節目如常播出街，就連網上重播亦沒有刪剪。
該片段曝光後，網民群起狂寸王梓軒，「原來一個月有300日，怪不得每個月等咁耐先出糧」、「王梓軒眼中，三萬只係散紙」，就連Don亦受牽連「佢應該唱首傻仔比王梓軒聽」。網民亦極速將王梓軒大起底，其父親是港區全國人大代表及香港藝術發展局主席王英偉，被指含住金鎖匙出世。
不過12年8月，有傳王梓軒的父親王英偉涉嫌公器私用，以香港藝術發展局主席的身份利用公營機構公帑及行政資源，為兒子的演唱會宣傳，事後王梓軒重申無獲父親資助。
緋聞女友感心痛
本報昨日致電王梓軒經理人兼緋聞女友石祐珊，對於王梓軒計錯數被網民嘲笑，她代王梓軒回應說：「冇諗過有咁大回響！導演話佢都冇留意，冇Cut到就出咗街，所以都有同我講話唔好意思，我就覺得當笑話咁笑囉。」
石祐珊又透露王梓軒身在台灣寫歌，對於網民揶揄他是二世祖？石祐珊心痛說：「佢一向孭住呢個責任，因為佢家人好成功，識佢嘅人都知佢好慳家，雖然佢有好成功的父母，但佢一直好努力。」
而Don昨日在電話中亦直言：「網民好犀利，仲諗住唔覺，當時冇理由截停佢。」Don得悉王梓軒被網民圍攻即維護對方：「佢係一個好謙厚的人，唔會攞錢去炫耀，係一個好人，希望大家唔好咁講佢，唔失誤邊有得笑，同埋佢真係有錢的話，又點會拍《Big Boys Club》。」
協力：袁楚楚
撰文：Pat
編輯：余運慶
插圖：何樂
設計：鄧俊明
|
鍾意就快D Share啦！
|
|
|