楊秀惠裸體瑜伽 視後見紅
無綫小花楊秀惠首度在劇集中解放性感極限，露出美背大玩祼體瑜伽，畫面香艷！事後搣打底膠紙搞到嬌軀現血痕的她，更預告與陳展鵬有不少對手戲，關係一觸即發！而秀惠昨日現身劇集宣傳時明顯消瘦，她透露上圍也縮水，要勤做運動令肌肉結實。
視帝鄭嘉穎、陳展鵬、楊怡及楊秀惠等主演的劇集《天眼》劇情漸掀波瀾，劇中演殺手的秀惠，令展鵬嗅出危險的味道！秀惠以冷艷性感造型現身，更破格挑戰祼體瑜伽，在畫面前首度獻出玉背，相當吸睛！
談到挑戰性感極限，秀惠笑言：「好好玩，自己有玩開瑜伽，畫面係一絲不掛，其實黐晒膠紙同遮住重要部位，唔擔心走光，導演有就住拍，畫面好靚！但拍完後搣膠紙見到有血痕，算係少少犧牲！（做足準備演出？）做咗啲背脊美白療程，擔心有粒粒，仲想啲線條好睇啲。」
楊怡遭綁架
秀惠稱事前不知有性感演出，今次可謂豁出去：「今次除咗扮靚，仲有好多動作戲，同過往有啲唔同，角色好有質感。」問到性感演出會否尷尬？她說：「唔會，今次演出好健康。雖然現場都係男性工作人員，仲有好多其他廠同事特登過嚟睇我拍，但作為演員唔會尷尬，同自己講要放開啲。」她笑言相當滿意今次演出，更預告稍後更有泳裝造型，與展鵬素有恩怨的她將有不少對手戲。
另方面，嘉穎與楊怡被捲入兇案，楊怡為調查少女援交案深入險地，更遭變態兇徒綁架，嘉穎與林夏薇等為救楊怡不惜以身犯險，過程驚險！三人亦將陷入複雜的感情關係。
上圍被縮水
昨日秀惠為該劇宣傳，她坦承近日清減不少，就連上圍也縮水：「我啲衫都要拎去改細，同埋成日做運動等肌肉結實啲。（有冇做胸部按摩？）我好保守要自己按，女仔要照顧自己身體。」談到剛過的元宵節，秀惠透露冇人約，惟有跟同事度過：「見到同事好幸福都好羨慕，冇人追就畀心機拍劇、主持同做生意，聽人講女仔主動冇咁吃香。（唔叫葉翠翠介紹男仔畀你？）咁應該唔止介紹畀我，仲有莊思敏呢！」
文：影視組
|
鍾意就快D Share啦！
|
|
|
