成龍甜入心：我依家已經無求！
【呂詠雯北京直擊】國際巨星成龍近日在北京接受本報訪問，大談兒子房祖名重獲自由後的轉變，暢談父子間點滴。對於祖名變得肯執碗、摺衫，成龍直指現時「仔好、老婆開心」，已到無求之境界！他驚訝以往睇電視都爆衝突的兩仔爺，如今竟可傾天光，愛子心切的他更忽發奇想，叫祖名：「不如你每年都返去坐半年！」貫徹他對兒子口硬心軟的作風。
成龍早前為新片《天將雄師》到北京出席答謝會，雖被傳媒追問房祖名近況，但他情願多番鞠躬，也拒絕回應。不過成龍接受本報訪問時，終於敞開心扉，暢談祖名種種轉變及父子間的點點滴滴，更直指現時「仔好、老婆開心」，人生已屆無求之境。
父子盡在不言中
成龍憶述當日祖名重獲自由，父子首度重逢的情景：「嗰日我都好匆忙，聽番公司同事講，個仔都好緊張，我上樓嗰陣，佢哋仲用對講機通水話佢知『老竇上緊嚟』，門一打開，我就同佢深深一攬，冇講嘢，見佢表情仲驚過我！阿嬌（林鳳嬌）就喺旁邊笑住話『吃飯吧！』。餐飯我哋冇乜講嘢，但感覺好溫馨，我哋好耐冇咁但耐咗有啲尷尬，好難形容，我咪叫佢講吓看守所情況，佢話同幾多人一齊坐、入面好凍，佢喺入面半年，一句怨言都冇，仲話『老竇，依家我比你經驗多，以後有事，問我！』，我留意到阿嬌不斷睇住我哋嘅表情，服侍我哋飲茶、食甜品，畀我哋兩仔爺傾偈，佢只係喺旁邊笑，嗰晚傾傾吓，不經不覺，好快就天光。」
拎碗摺衫性格變
熬了半載的祖名轉變甚多，成龍大讚他說：「覺得佢變得有規矩咗，佢以前好懶懶閒，集中力唔夠，依家見佢將啲鞋擺到好整齊，又食晒佢阿媽煮畀佢啲嘢食，仲肯拎碗、摺衫，見佢咁，我咪同佢講：『不如你每年都返去坐半年！』佢話冇事點入呀？我就講笑叫佢去要求囉，嗰度又靜又可以寫歌！（父子感情拉近咗？）以前一講嘢好快就起衝突，睇電視都可以有衝突嘅，依家唔係。我感覺到佢有好多嘢想講我知，又彈歌畀我聽，又話想寫劇本。（你一句都冇鬧佢？）冇！都既成事實，鬧都鬧唔番，佢都受咗懲罰啦，不過佢唔敢抬頭望我，好愧疚咁樣，但咁嘅祖名，我反而唔慣。」
成龍亦已不像昔日般「苛刻」，從前的他堅持不跟祖名合作，現在反而覺得無所謂：「韋史密夫都可以停工半年幫個仔，我都取消咗自己嘅堅持，佢話想參與《十二生肖》續集劇本，啱嘅就做！佢唔係小房子，長大咗，令我安心咗，係大房子！我想訓練佢做導演同幕後，之前佢作咗首歌叫《殺》，曲係佢作，詞就一齊填，佢作曲好有天分，唔好嘥！我依家已經無求，仔好、老婆開心、人生順利，再有要求就畀雷劈」
阿嬌有仔萬事足
對成龍而言，祖名可謂「失而復得」，他說：「當日我真係唔知（祖名被捕），仲以為係綁架，或者已撕票，後尾知道反而放心，事發後一星期，我不斷諗點解呢種事要發生喺我身上？我聯絡唔到佢，亦冇搵人幫手，因為我唔知點講呀！（有律師朋友幫你？）佢哋開解我啫，我一直相信司法公正，我冇幫個仔做任何嘢，依家還咗我清白啦。」
成龍對家人向來口硬心軟，對兒子房祖名如是，對太太林鳳嬌亦然，自祖名出事後，他既要忙工作，又要煩心祖名，對阿嬌的關心更無微不至，他說：「事發後阿嬌日日留喺屋企，我怕佢抑鬱，日日發message畀佢，點知個仔返咗嚟就有仔萬事足，依家我傳到第8張相畀佢，佢至肯覆我：『哦！』不過冇所謂啦，佢依家肯出去見吓啲老朋友，佢開心就得！我都好開心。」
|
鍾意就快D Share啦！
|
|
|
