2015年3月1日星期日

Kris爆床照告爆料者誹謗 Kris,吳亦凡,

【韓流】Kris爆床照告爆料者誹謗

2015-02-28 17:33:00

傳聞係Kris同女朋友。

韓國男團EXO嘅前中國籍成員Kris（吳亦凡），星期一時被爆一大堆「私房照」，當中包括半裸上半身騷紋身、喺床上嘟嘴賣萌嘅自拍，更有疑似同女友晒情侶戒指嘅相。之後，Kris方面透過微博回應事件，表示「私房照」係無中生有嘅小把戲。今日，Kris方面就連日來嘅戀情緋聞發聲，譴責緋聞惡意中傷，表示會通過法律途徑處理事件。

Kris方面表示緋聞戀情係虛假資訊，相關圖片只係惡意偽造，因此發佈「反黑舉報公告」，表示：「惡意泄露隱私訊息、惡意傳播同惡意捏造歪曲事實，既破壞吳亦凡同相關人員良好嘅公眾形象，又破壞互聯網訊息安全，造成極其惡劣嘅負面影響同危害社會，嚴重侵害吳亦凡先生隱私，損害吳亦凡同其他相關人員名譽權，並涉嫌構成非法獲取公民個人訊息罪、侵犯通訊自由罪、誹謗罪等。而相關發佈者同傳播者則將面臨被追究相應法律責任。」

Kris嘅是非同官司就真係多，早前被原所屬嘅韓國SM事務所出禁制令，話佢喺未正式解約之前無視合約精神，擅自喺內地接job，就連請Kris做嘢嘅電影商、廣告商等等都受到警告。不過，Kris就似乎冇驚過，喺SM發出禁制令之後繼續出騷，而今日亦有消息話佢會客串周星馳嘅新戲《美人魚》。

話說，周星馳公司嘅項目同業務總監陳震宇早前喺微博度留言話：「最近同白頭髮嘅人幾有緣份。」而咁啱Kris之前又由黑髮染成白髮，所以有粉絲初時都估係Kris，其後，陳震宇又再次喺微博話：「終於見到傳說中吳亦凡表哥。」據知，呢位「表哥」係吳亦凡貼身工作人員，喺粉絲團入面亦都好出名，最近仲紅到上埋微博熱搜榜第一名，所以Kris演出《美人魚》嘅可能性非常大。