掃呢頁CODE去手機

2015年3月11日 星期三

毒男新女神 唔吼窮奀星 富貴陳瀅:以前男友做生意 [FACE - 407] 陳瀅,MF,




陳瀅出入揸開 40萬開逢 Audi TT跑車,雖然陳瀅話追佢唔使有錢仔,不過毒男見到女神座駕咁強勁都未必敢埋身。

封面

毒男新女神 唔吼窮奀星 富貴陳瀅:以前男友做生意

唔係大台力谷,網友就照單全收嘅,好似剛播完的《 4個女仔 3個 BAR》擺明力谷陳凱琳上一綫,可惜網友另有所愛,佢就係劇中飾演律師之一嘅陳瀅,每次出場網友必定瘋狂 cap圖兼在討論區洗版。成為一眾毒男最愛,除咗讚女神有「世界級靚股」,竟連劇中陳瀅嘅洗腳水都想飲,毒到入心。

最近有傳被劇中的巨聲仔林景程追到手,不過陳瀅表示冇可能,仲話唔會揀圈中人拍拖。屋企有個富後父,出入有名跑、租住靚私樓,女神竟話:「我以前男友做生意,唔係有錢人,做我男友唔使有錢。」你信嗎?








劇中林景程真係有追陳瀅嘅情節,不過係失敗,估唔到連現實都係食白果。電視畫面

25歲陳瀅原名鄭鈺瀅,媽媽第二任丈夫為國內商人經營商場,在國內有商場大王之稱。阿媽改嫁令陳瀅變身富家女,喺加拿大哥倫比亞大學工商管理學士畢業,回港簽約成為 Starz People藝人。由於陳瀅樣貌標緻,一入行已成廣告新寵,之後更拍電影《在一起》及《寒戰》,去年首次拍大台劇《女人俱樂部》飾演少女版陳慧珊。

巨聲仔想食天鵝肉

早前《 4》劇成班演員到九龍城食飯,劇中飾演醫生的林景程,當日頻頻黐住陳瀅,又出手搞女神頭髮,但陳瀅嚇到縮頭,堅持二人只是朋友。她說:「我冇縮,我諗我凍啫,我唔記得喇。」

之後林景程追住陳瀅唔放,好彩姊妹劉佩玥識做,即刻攝喺中間。

後父強國開商場

陳瀅雖然盡量低調,不過佢後父喺強國經營大型商場。富貴真係好難低調,難怪陳瀅坐商務揸跑車住新樓,雖然佢話唔想揀有錢男友,又肯 AA制,不過聽住先

好感情

陳瀅同後父感情融洽,不過對於父親生意就不想多提,只表示喺國內開商場。網上圖片

坐商務

女神揸加拿大護照,搭飛機又坐商務,真係羡慕死人。網上圖片

揸 Audi

陳瀅平時揸價值 40萬 Audi跑車代步,想追女神真係唔易。

住新樓

陳瀅現租住紅磡寶御, 500呎月租二萬左右。

唔敢上高登

喺《女》劇表現未算突出,加上造型問題,令不少高登仔覺得陳瀅唔靚。她說:「嗰陣有睇留言版,個個話我肥又唔靚,仲話我唔應該同其他 6個女仔一齊,其實都好 hurt。」當年被網友 hurt,但最近播完嘅《 4個女仔 3個 BAR》,劇中飾演律師經常穿窄身套裝,世界級身材終於令網友改觀。

除咗毒男嗒糖,連劇中拍檔、出身平民的巨聲仔林景程都想力追。前週五( 27日)《 4》劇結局飯局後,林景程有意冇意想接近陳瀅,不過陳瀅一直同他保持兩個身位距離。對於被指林景程追到手,陳瀅斬釘截鐵話:「冇可能,我同佢、陳凱琳係好朋友,呢個傳聞好唔真實。」

《 4》劇中四位女主角,現實中都是富家女,難得 4位富千金肯喺大台捱,兼且係好姊妹。

週日( 8日)陳瀅就同朋友一齊到荔枝角跳蚤市場行街,期間有唔少人搵陳瀅合照。

網友讚 pat pat世界級

毒男口味真係難估,除咗 like陳瀅靚樣同 body,竟然特別鍾情佢個「優質股」,仲用世界級嚟形容,變態到連劇中陳瀅做腳底按摩的洗腳水都話想飲,不過陳瀅聽到呢啲粉絲咁瘋狂都話:「 Oh My God!」

心心咪

唔只有靚樣,陳瀅仲有 C cup事業線,加埋呢個心心甫士,毒男真係不行了。網上圖片

身形靚

陳瀅身高 5呎 5,高度啱啱好,加上身形勻稱,又肯騷靚 body,自然成為毒男最愛。網上圖片

狂晒股

被毒男稱為「世界級」靚股,陳瀅當然有喺 ig騷下啦,呢張就算見唔到樣都夠晒誘惑。網上圖片

陳瀅認真有電力,宅男連劇中做 spa用過嘅洗腳水都話想飲,真係好毒囉。電視畫面

男友唔使有錢

陳瀅除咗有個富爸爸,出入揸 Audi名跑,亦租住紅磡靚私樓做單身族。

個個以為冇咁上下身家唔使埋佢身,不過陳瀅話:「我𠵱家冇拍拖,之前男友一個讀書識、最近一個做生意嘅,因為異地戀所以最後和平分手,我揀男朋友唔使有錢。我之前冇一個係有錢嘅,出街食飯我 AA制,我有時仲會請男朋友食飯,最緊要心地好、大家又夾到。有時覺得揀個有錢男朋友仲大壓力,我唔鍾意呢種壓力。但𠵱家真係冇,亦 feel唔到有人追我。」毒男聽到係咪舒服晒呢?

上位易

陳瀅 10年簽約 Starz People成為女模,一入行已成為多個廣告主角,其中同李治廷合作的隱形眼鏡廣告最為經典,之後更拍電影, 13年仲同當年未吸毒嘅柯震東拍《在一起》!上位容易,拍完《 4個女仔 3個 BAR》,陳瀅又有份拍謝安琪 BB嘅《殭》囉!

10年陳瀅剛入行,即拍住當年新人王李治廷拍〈 1-Day ACUVUE〉廣告。電視畫面

13年拍《在一起》,戲中同柯震東有對手戲,男神仲專登車佢返屋企。

13年拍《女人俱樂部》,劇中飾演陳慧珊少女版,但被網友話佢肥,兼襯唔起其他 6位主角,令佢唔開心到唔敢睇討論區。

天鵝肉點先食到?

有錢又靚女係仔都想嗒啦,以下 4位就係食天鵝肉嘅最佳例子,不過有人天長地久,有人卻慘被飛甩,講到尾,都係講心啫!

吳浩康最吹得

《蘋果日報》圖片

06年吳浩康靠口甜舌滑,加埋唱得兩嘴冧歌,成功溝掂身家達 8億的大馬拿督長女莊思敏。可惜天生花弗,俾莊思敏於 11年飛甩,最近又爆出背住女友鍾舒漫偷食,偷食慣好難改。

陳子聰靠靚仔

《蘋果日報》圖片

曾經好靚仔的男模陳子聰,於 03年成功娶咗百億賭王乖女何超儀,二人感情一直要好,即使婚後陳子聰極速變肥都無損二人恩愛,可以話係食天鵝肉嘅成功例子。

陳山聰玩潮流

大台奀星陳山聰曾經靠着衫夠潮,冧掂賭王乖女何超雲,期間陳山聰更爆出拋棄前妻,可惜潮流唔長久,二人 11年拍拖, 13年玩完,陳山聰亦要重返大台捱世界。

吳克羣贏浪漫

又係賭王千金,今次超蓮就俾台灣人吳克羣冧掂。事緣 11年吳克羣為了氹超蓮,不惜出動大黃蜂同女友上車睇夜景談心,二人拍拖 3年至今依然恩愛。

鍾意就快D Share啦!