掃呢頁CODE去手機

2015年3月11日 星期三

夠晒創意 屎橋救亡  TVB播足 7日膠劇 [FACE - 407] TVB,MF,




真面目

夠晒創意 屎橋救亡  TVB播足 7日膠劇

你講唔講得出大台周末、周日有乜嘢睇?就算你講得出都唔代表收視高,就算扮晒有姿態嘅《今晚睇李》平均收視都係得 17點,之前套《超級巨聲 4》仲試過低至 13點,慣性收視冇咗好耐喇!

唔使驚!高層梗有屎橋,就係將一至五嘅劇集拉長嚟播,播足 7日,於是拍緊嘅劇集例如《公公出宮》就要臨時寫多至少 5集劇本囉!有份主演嘅蕭正楠就戰戰競競咁講:「演員好被動,如果真係提升到收視都好嘅!」最怕收視冇提升,反而觀眾日日捱足 7日膠劇啫!

除咗之前《超級巨聲 4》收視差,現周日播緊嘅《明星愛廚房》同《 Sunday靚聲王》平均收視同樣得 20點,李思捷嘅《今晚睇李》被批評不倫不類又抄橋之下收視得番 17點,由余詠珊睇場的綜藝時段全線慘淡收場。

《 Sunday靚聲王》平均收視 20點

《 Sunday靚聲王》專唱懷舊歌,反而收視有啲交代有 20點,屬周末、周日黃金時段最高。

《今晚睇李》平均收視 17點

扮晒外國 talk show又有嘉賓助陣,得十幾點收視實在唔合格,網民大叫收皮,大台都係時候順應民意喇!

《超級巨聲 4》平均收視 13點

曾經過廿點嘅《巨聲》已風光不再,集數亦是歷屆最少,得 13集就玩完。

《明星愛廚房》平均收視 20點

大路綜藝節目,成本低,煮食節目一向有收視, 20點算緊緊合格

蕭正楠:盡做啫!

據知大台極高層覺得太冇面,更現實是無法面對畀咗錢嘅廣告客啦,於是諗出絕橋,就係將劇集一星期播足 7日,炒起綜藝節目,換言之,一直由余詠珊玩晒嘅周末、周日地盤,要讓位俾劇集部曾勵珍插旗。

由 6月開始,星期六、日晚的 9:30時段將會播劇集,稍後《愛.回家》亦可能加入;而正拍攝中嘅《公公出宮》、《刀下留人》、《拆局專家》同《殭》都可能要改劇本加長集數。有份拍《公公出宮》嘅蕭正楠回應時話覺得演員好被動:「聽過有咁嘅事,暫時我哋會加多 5集,變咗 35集,唔知會唔會加 8集!我覺得演員好被動嘅,如果真係提升到收視都好嘅!要大家支持囉!」問佢驚唔驚觀眾睇到厭,蕭正楠答:「盡做啫!」

而已經拍完嘅例如陳展鵬嘅《張保仔》、陳豪嘅《鬼同你 OT》等等,或者要重新剪輯,隨時為遷就集數而拖慢劇情。原來大台唔只膠劇真心膠,屎橋都係真心屎!

正在拍攝的《公公出宮》由《大太監》原班人馬孭飛,蕭正楠已收到通知要加多 5集。網上圖片

網上圖片

《飛虎 II》於周日播放平均收視有 22點,雖然劇情離晒譜,但總好過啲綜藝節目,難怪班高層要將膠劇播足 7日。電視畫面

《殭》加 4集

大台連番收視暴跌,不時要請外援救亡,女神謝安琪客串過《老表》之後,有份參與的新劇《殭》亦已決定加 4集,睇吓幫唔幫到手

《蘋果日報》圖片

《回家》未加

電視畫面

《愛.回家》已經播咗七百幾集,黎諾懿話暫時未收到通知,如果播埋星期六、日,應該好快就過萬集,你睇厭未?

《蘋果日報》圖片

大台樂易玲(左)早已失勢,余詠珊(中)本來如日方中,點知綜藝連遭滑鐵盧,連周末、周日黃金時段都要讓路俾曾勵珍(右)揸旗的劇集。

膠劇拖得就拖

新綜藝節目未見有宣傳計劃,反而唔少劇集已經拍完排緊隊出街,但大台臨時變陣,本來橫跨 4個禮拜嘅 20集劇集,就要剪接到 28集,無端端多咗 8集,點樣變出嚟呢?

《張保仔》

又古裝奇幻又穿越時空,由陳展鵬、洪永城、陳凱琳主演嘅《張保仔》本來已定咗 30集,一係剪走兩集,一係加多 5集至夠數,睇情況都係加多!

《梟雄》

原定 30集,有外援黃秋生同湯鎮業,仲有黎耀祥、胡杏兒,遠赴上海實景拍攝,都有啲期待,但若果拖長咗集數搞到不倫不類,秋生分分鐘嘈到去大台喎!

《鬼同你 OT》

陳豪、田蕊妮、胡定欣擔正嘅《鬼同你 OT》原定 20集,係鬼片又係喜劇,講胡定欣係隻鬼,田蕊妮被鬼上身陪陳豪返工,拖到咁長真係鬼同你 OT!

《東坡家事》

《東坡家事》以詩人蘇軾生平為藍本,有歐陽震華同萬綺雯,原定都成 30集,不過要加長應該唔難,叫 Bobby諗多幾首詩咪得囉!

鍾意就快D Share啦!