掃呢頁CODE去手機

2015年4月17日 星期五

爭唱《武則天》 吳若希煩音𦧲贏鍾嘉欣 [忽然1周 - 1029] 吳若希,鍾嘉欣,嘉欣,武則天,MW,



鍾嘉欣和吳若希同樣是 Herman打骰的星夢娛樂旗下歌手,𠱁得老闆歡心,就自然獲得較多工作機會。

娛樂喧

爭唱《武則天》 吳若希煩音𦧲贏鍾嘉欣

拍戲爭做主角聽得多,但片尾曲都要爭餐飽,真係聞所未聞。大台本月 26日將會播出重金買回來的外購劇《武則天》。據知近期因「典解嘅」無限 loop爆網絡的吳若希,曾主動向老闆何哲圖( Herman)要求唱主題曲,但最終鬥唔贏樂壇天后容祖兒。

本刊收到消息,原本唱片公司分好了片尾曲由嘉欣 BB唱,吳則唱插曲。但吳若希覬覦片尾曲出現次數較多,結果以「奪命煩音」向 Herman軟硬兼施,成功爭取唱片尾曲不特止,連插曲都可以與嘉欣 BB合唱,嘉欣 BB今勻真係徹底輸晒。








爭議劇集

在全國收視之冠的《武媚娘傳奇》(內地名)中,范冰冰等女星因拋胸鏡頭成為熱話,套劇咁震撼,梗要搵天后容祖兒唱主題曲

雖然港視冇牌加亞視不獲續牌,一台獨大的大台近期仍收視急跌,自家製作膠劇一大籮,惟有向外搵救兵,買入范冰冰主演的《武則天》打仗,更一星期播足七日。

爭唔贏容祖兒

《武》劇中女角一律要「封胸」,因此未播已有話題。套劇講述宮廷爭鬥,原來背後同樣是非不絕。據知近期以睇魔術睇到成日「典解嘅」、「好打耳呀」成網絡紅人的吳若希,自恃得寵,曾主動向所屬的星夢娛樂揸 fit人 Herman要求唱《武》劇主題曲。可是因《武》是大劇,大台不容有失,主題曲一早屬意能壓台的樂壇天后容祖兒主唱。知道爭唔贏天后,吳若希都好醒水,退而求其次打片尾曲及插曲主意,並軟硬兼施死𦧲Herman。

一知情人透露:「其實 Herman本身已經諗掂咗搵嘉欣唱片尾曲,而吳若希就唱插曲,不過吳若希對呢個安排好唔滿意。佢周圍同人講,話片尾曲嘅吸引力一定高過插曲,有時仲分分鐘 hit過主題曲,你睇〈越難越愛〉咪係好例子囉!有晚吳若希錄完《勁歌》,就同 Herman去咗 canteen,一路食一路傾,吳若希仲爭俾錢㖭!第二朝 Herman就通知我哋,片尾歌改由吳若希唱, Herman仲話想自己監製番片尾歌㖭!」

忽然轉軚

曾錫到嘉欣燶的 Herman,對方開騷定必拉大隊撐場。可惜前年忽然轉捧吳若希,嘉欣 BB冇碇企。

分手救事業

一直玩開地下情的嘉欣 BB與伍允龍,前年突然轉高調,有傳因此辣㷫公司被雪藏。近日有指二人甩拖,嘉欣 BB有望「復出」。

嘉欣黑面

其實鍾嘉欣一直是 Herman愛將,但早前盛傳她與拍拖八年的伍允龍有意公開戀情,因此遭唱片公司投閒置散。直至近日,有指嘉欣回復單身,工作機會離奇增多, Herman亦打算讓她唱《武》片尾曲,同時更安排她今年出碟。

知情人續說:「早兩日見到 Herman約咗嘉欣上房傾。嘉欣聽到 Herman話片尾歌轉俾若希唱,佢『哦』咗一聲,就木無表情冇俾反應。 Herman之後仲叫佢同若希 share隻插曲,又話揀咗首靚歌,一定 hit,仲叫嘉欣隨時可以去錄自己嗰部分就得。唉!其實嘉欣真係唔適合呢行,俾人硬搶嘢,都只係黑吓面就算,俾着其他姐仔,實嘈到拆天。」本刊曾多次致電 Herman,但至截稿前仍未回覆。

不幸事接踵而來的吳若希,繼母親炒單車昏迷近日稍有好轉,外婆亦病逝,對一個廿多歲的女仔來講打擊甚大,但她卻堅強面對,值得嘉許。

點解多是非?

23歲的吳若希,自從前年做埋大台親生女後,即被逐步捧上位。可惜人紅是非多,影過泳照及與男友咀嘴親密照的臭史亦逐一被揭。

扮可愛

日前在魔術節目中,對於被指一早知魔術師 Louis點變出魔術的吳若希,卻依然集集以扮傻腔口大叫「典解會咁嘅?」及「好打耳呀」,被網民插爆。

粗口鬧網民

上月尾吳母與男友炒單車昏迷入院,她不滿有網民侮辱其母,不惜網上把對方起底,並以粗口回敬對方,網民對其行為有撐有彈。

高調啜仔

去年網絡瘋傳吳若希與舊男友咀嘴的閃卡,玉女形象幻滅。

疑變臉

當上歌手不久,即被揭早年做 model時曾拍三點式泳照,被取笑「 iPad」胸冇身材,更被質疑樣貌疑加工。

鍾意就快D Share啦!