葉家寶挑戰百萬富翁 「想李嘉誠買亞視」
也許，這是葉家寶近月來笑得最燦爛一天。
「可唔可以畀我玩百萬富翁先？」家寶托一托眼鏡，信心滿滿的坐在鏡頭前迎接挑戰。或許他深信捧走一百萬，或可解決亞視出糧的燃眉之急。
面對十六條尖酸問題，家寶都有自己的獨特答案。原來家寶早前跟陳啟泰通電，對方提議在亞視熄燈前搞個《百萬富翁》慈善版，可惜未能解決版權問題。不過，家寶仍有意搞個山寨版，讓一班員工留下美麗回憶。
採訪：嵐山、馮國康
■亞視七朝元老葉家寶，對亞視歷史瞭如指掌，玩《百萬富翁》可謂無得輸！攝影：陳志嵐
【$1,000】
為甚麼仍留在亞洲電視工作？
A：好愛亞視
B：唔愛TVB
C：未搵到工
D：可以經常見報
答案：A
家寶解讀：我鍾意亞視，但我要補充，係好鍾意亞視嘅員工，同一班有同一理念嘅人一齊工作好開心，我更加要留守喺度。
【$2,000】
葉一堅與葉家寶有甚麼親戚關係？
A：堂叔姪
B：堂兄弟
C：表兄弟
D：冇關係，只是同姓
（打電話）
答案：A
家寶解讀：佢個仔叫我做叔公，係咪應該係堂叔姪呢？總之葉一堅個仔叫我做叔公啦。因為葉一堅叫我做阿叔，佢個仔咪叫我做叔公囉。
【$3,000】
最近亞視邊個最紅？
A：王征
B：葉家寶
C：蔡國威
D：宮雪花
答案：C
家寶解讀：梗係蔡國威《六合彩》咁多人睇，佢最近喺報紙成日見報，都算一個資深員工。王征話題多，但出鏡都唔夠蔡國威高，只係報紙多。
【$4,000】
最希望邊個成功買入亞視？
A：王維基
B：陳國強
C：徐小明與財團
D：黎智英
以上皆非，家寶解讀：陳國強冇乜可能啦，唔可以壟斷。但我覺得最好係李嘉誠，呢幾個人嘅實力都唔及李嘉誠，同埋佢係世界排名嘅亞洲首富。
【$8,000】
請問邊一位係歷屆亞視最好嘅老闆？
A：王征
B：林百欣
C：邱德根
D：冇個好
答案：B
家寶解讀：我同林百欣先生共事咗一段時間，食過佢嘅魚柳包，佢真係好關心亞視，亦都好愛亞洲電視，不斷注資嗰段期間做咗好多好成功嘅節目。
【$10,000】
如果時光倒流，最希望能制止那一件事發生？
A：空凳掟壽包
B：政總門外跳舞
C：岩布仙尼唱「生日歌」
D：誤報江澤民死訊
以上皆非，家寶解讀：如果可以時光倒流嘅話，我希望可以制止特首同行政會議成員唔發牌畀亞洲電視，我哋希望可以繼續服務香港市民。
【$20,000】
你心目中的亞視是甚麼？
A：良心電視
B：亞洲CNN
C：仆街，亞視嚟嘅喂
D：唔知乜嚟㗎
以上皆非，家寶解讀：湖南衛視有個《快樂大本營》，做得好成功好開心，所以我希望亞視都帶畀香港人開心同歡樂，係呢個高級嘅歡樂囉。
|
鍾意就快D Share啦！
|
|
|