楊怡 羅仲謙排隊買樓築愛巢
年齡相差5歲的楊怡與羅仲謙愛得愈來愈高調，持續3年的姊弟戀最近屢傳婚訊，開花結果！最近阿謙事業起飛，扭轉當初「女尊男卑」局面，有讀者爆料指昨早巧遇兩人情侶裝睇樓，同行還有未來外母監場，看來楊怡一心Mark實謙仔做終身伴侶，齊齊築「愛巢」，增添「嫁數」！
35歲的藝人楊怡與30歲的羅仲謙拍拖三年，姊弟戀並沒令兩人的溝通出現鴻溝，反而默契十足，愛得愈來愈甜蜜，兩人不時公開談及並認定對方，更屢傳婚訊！昨日有讀者撞破楊怡和謙仔，於早上十時半以情侶裝打扮一同戴帽低調現身紅磡，排隊購置長和新樓盤、位於將軍澳日出康城的緻藍天築「愛巢」！
超額抽唔中
該樓盤正式開賣首批只有740伙，據知已接獲超過1.6萬的認購登記，如此爭崩頭皆因此樓盤是出名筍盤，三、四房更連工人房，最平603萬元，首日已吸引數千人排隊，楊怡與謙謙正是其中兩位，而未來外母即楊怡的母親更陪伴在側，可見「一家三口」對購置新居多麼熱切緊張！由於現場情況混亂，多人又擠迫，只見楊怡與謙謙拿着售樓書頻頻交頭接耳，謙仔更充當「護花使者」，在人潮中護住女友，免受其他人碰撞，認真溫馨！其實楊怡與謙仔早已認定大家，更不斷被傳將拉埋天窗，加上兩人事業發展一帆風順，今次一齊夾份投資買磚頭置業，明顯已準備好踏入人生新階段，擺明好事近！
記者昨日問楊怡被斷正與男友睇樓，她說：「都係叫佢（謙仔）投資啫，我有啲心得，大家互相分享吓！結婚就唔會住，係以後嘅嘢，唔係依家講！」明顯婚事逐步計劃中。她又笑言自己今次又抽不中，下次會再嘗試。
女友教投資
男主角謙仔亦向記者透露自己有意投資：「楊怡有畀意見我！揀將軍澳就因為近返工，而且我好欣賞嗰度嘅規模同潛力。（係咪兩人夾錢買樓？）當初有幾個方案，不過依家反正抽唔中，都Plan唔到下一步喇！」
而楊怡去年才與無綫續約兩年，是買樓方面的「前輩」，去年她抽中大角咀奧朗御峯但未能成功買入，之後又現身紅磡城中匯發售現場揀樓，今次她再接再厲又睇樓。而一直被指女尊男卑的謙仔近年事業發展愈來愈順利，平步青雲的他深得經理人公司星皓寵愛，去年以開心價加簽9年，最近擔正做無綫青春劇《衝線》男主角，又接演星皓明年賀歲片《西遊記之孫悟空三打白骨精》，愈搵愈多的他更愈來愈多女主動埋身，早前就有指他被《衝線》拍檔蔡思貝電到暈陀陀，令楊怡要全程（目及）實保「仲」，為免夜長夢多，楊怡今次索性齊齊睇樓箍實謙仔，為將來婚事鋪路！
文：專案組
|
鍾意就快D Share啦！
|
|
|
