嘉穎認陳凱琳入屋：由朋友開始！
男神鄭嘉穎昨被《好報》踢爆與23歲的新一代女神陳凱琳（Grace）暗撻兩個月，Grace更與嘉穎前後腳上嘉穎的大坑住所，兩人短聚了兩個鐘！「穎琳戀」爆出後，嘉穎與Grace昨日被追問戀事，嘉穎直認Grace當日是上他家借影碟，兩人又夾晒口供，同指大家是朋友，嘉穎更補了一句：「任何嘢都由朋友開始。」似為戀情鋪路。
昨日出版的《好報》踢爆45歲的鄭嘉穎與陳凱琳因拍無綫劇《殭》撻着，Grace更被拍得與嘉穎前後腳上嘉穎位於大坑的住所，兩人短聚了兩小時！嘉穎昨返將軍澳電視城為《殭》開工，即被追問與Grace前後腳上住所一事，嘉穎謂：「嗰日喺會展做完影視展，我要繼續開工，之前同佢傾開電影，佢好上進，鍾意睇戲睇劇，希望演技有進步。我屋企有非常多DVD，咪同佢講，想借嚟睇咪上嚟囉。由於當日我要繼續開工唔喺屋企，佢上去有工人開門，就係咁簡單，唔好諗咁多，好多人都上過小弟屋企，好似唐詩詠、馬國明、曹永廉、林子善，有排數。（Grace成日上你屋企？）一次咋。」
年紀不成問題
談到新戀情，嘉穎說：「套劇未拍完已經咁多宣傳，開劇都係兩個月，咪即係一開劇就撻着！」問對Grace有冇感覺？嘉穎謂：「依家係朋友感覺。（有冇機會發展﹖）暫時都係朋友，任何嘢都由朋友開始，又唔可以講得咁死，依家只係朋友、同事。（年紀差距會唔會係障礙？）小弟唔會考慮呢個因素，主要係睇溝唔溝通到，timing啱唔啱。（Grace仲會再上你屋企借碟還碟？）借完就算，邊有咁多碟，『豉油碟』就有，可以喺公司還都得。」
再問嘉穎日後跟Grace一同出席公開場合會否尷尬？他謂：「一啲都唔會，大家做呢行，尤其係小弟，如果想我有老婆，照顧吓小弟，任何嘢都係由朋友開始，大家高抬貴手啦。」
「唔需要避忌」
至於Grace昨被問到與嘉穎暗撻，她明顯事前已與嘉穎夾好口供，並謂：「當日傾完電影嘢，再去影視展，之後上佢屋企借碟，係工人開門嘅。（影到嘉穎車埋你走？）嗰日佢拍完嘢，有個空檔返屋企，咁啱我攞完碟，又要返電視城開工，佢咪車埋我囉。」
不過，《好報》拍得嘉穎與Grace返電視城後，又避忌地前後腳入廠，令人更加覺得兩人甚有默契，對此，Grace說：「唔需要避忌，真係冇嘢，避咪仲奇怪！」問到兩人年紀有所距離，Grace又與嘉穎口徑一致：「年紀唔係問題，夾唔夾到同溝通到先係最緊要！」
文：影視組
|
鍾意就快D Share啦！
|
|
|
