朱慧敏難忍偷食 婚禮無期
《好報》獨家踢爆前EO2成員彭懷安（Eddie）背未婚妻朱慧敏午夜偷嗒「長腿G.E.M.」後，成為全城熱話！二人原本定於明年拉埋天窗，但最後到底會「婚」定「分」呢？朱慧敏前晚忍痛為《愛．回家》開工，嬲爆揚言：「我個人希望延遲（婚期）！」為此更不惜多付酒席錢！而Eddie昨晚現身時表示已獲未婚妻原諒，稱一切以朱慧敏行先！
朱慧敏承認與Eddie冷戰一個月，更因對方的偷食報道而失眠。
Eddie表示與朱慧敏因婚禮事宜未達成共識，需要抓緊時間溝通。
朱慧敏拍《愛．回家》時表情多多，不時伸脷兼笑住揮手。
前EO2成員Eddie被《好報》獨家踢爆偷嗒索女「長腿G.E.M.」陳惠敏後，雖然他前日在Facebook及微博向「老婆」認錯，但朱慧敏明顯未下氣，前晚在堅尼地城拍攝無綫處境劇《愛．回家》時，先含淚指Eddie非「初犯」：「類似嘅事已經唔係第一次發生！」問到此事會否影響婚期？她揚言就算要多付錢都希望延遲婚期：「一定會（影響到）o架原本打算年頭結，一直未公布日子，我個人希望延遲！呢件事畀到我哋磨練同成長嘅機會，我希望朝住開花結果為目標。」至於延遲酒席要額外付錢？怒氣未消的她嬲爆說：「唔理得咁多」
朱慧敏又自爆得悉事件後即失眠，與Eddie已「失聯」一個月，坦認正冷戰中：「我哋一個月冇聯絡，但唔關今次事，係我哋有問題出現，畀啲時間我！（你哋一齊住？）不嬲唔係，冇見面！但日子都係咁過，唔係世界末日嚟，睇吓佢點回應！（有冇一刻打算取消婚事？）我依家答唔到你。（接受對方網上道歉？）答唔到你。（當晚佢有同你交代行蹤？）有話去應酬，但細節冇講，我畀佢自由度好大。」她並無明確表示想取消婚事，據知經一晚調整心情後，昨日接受本報電話訪問時說：「心情平復咗，有新決定再同大家講！」
「唔覺佢對我不忠」
雖然朱慧敏為了Eddie「偷食」一事冇覺好瞓，但她仍不忘為未婚夫講好說話，大讚Eddie是好人，一直都信任他：「彭懷安係一個好人，佢心地善良，可能有時冇諗咁多，佢想送個女仔返屋企，我唔覺佢係會對我不忠或者越軌，呢方面我信佢，只係有事情要出嚟回應，避免誤會。」又坦言曾叮囑Eddie要避忌，自稱好信真憑實據：「除非睇到好激烈或親熱啲片或相，就可能OK Bye Bye！（叫Eddie出嚟交代？）我唔會，如果佢成熟會自己出嚟。其實做錯唔緊要，做人要有責任心。如果有咩就避、關電話，Sorry,not my style！」
「唔係第一次送人返屋企」
另外，Eddie昨晚約8時許拖住外娚仔現身大埔，遇上記者亦願停下受訪，問到心情如何？他說：「要同Queenie（朱慧敏）溝通吓，有聯絡過，要同佢解決我哋之間嘅問題先，已經唔係講緊今次事件，係同佢婚禮上嘅問題，因為未有共識，需要時間諗吓。（同佢有一個月冇聯絡？）係！」Eddie承認已獲女友原諒，並已向對方解釋事件：「不過解釋之前佢已經信任我，總之同佢溝通之後會畀個答覆大家。（佢話你已經唔係第一次！）我真係唔係第一次送人返屋企，主要係同女友交代，等佢安心，亦冇喺人哋屋企過夜！」他更承諾以後不送女性朋友回家以避嫌，向女友派定心丸！
談到朱慧敏表示婚禮將押後，Eddie表示雙方會按目標行事，因雙方已有一個月沒有聯絡，故也會抓緊時間：「之後係點就任由佢點做點講，我一心朝住結婚方向。（驚唔驚唔知延到幾時？）所以我要盡快溝通，都要知佢想我點做，我都諗緊溝通內容，短期內會同Queenie見面。」問到事發後有否與「小三」聯絡？Eddie冷笑一會說：「其實同佢唔係好熟，都冇同佢聯絡。（個女仔喺網上話畀人誤會！）我都唔講佢，依家只係專注喺女友度，同埋我以後都會小心啲！」
朱慧敏承認與Eddie冷戰一個月，更因對方的偷食報道而失眠。
Eddie表示與朱慧敏因婚禮事宜未達成共識，需要抓緊時間溝通。
朱慧敏拍《愛．回家》時表情多多，不時伸脷兼笑住揮手。
|
鍾意就快D Share啦！
|
|
|
