曾幾何時，港人對港視心存希望。隨着被「一男子」拖累而不獲發免費牌，近日收視又急跌，到9月尾播完最後的五部劇集後，王維基方面直言已決定暫停製作節目。與此同時，無綫和nowTV今後將拍中港合拍劇來迎合內地觀眾，意味着港人曾引以為傲的港產劇，可能等唔切發叔，隨時玩完。港視孖寶王宗堯及周家怡則希望港劇有得留低。
最近無綫重播陳年舊劇《大時代》和《他來自江湖》，觀眾反應超出預期，但這些港產劇未來可能只會成港人的集體回憶。無綫日前公佈與阿里巴巴旗下的娛樂寶合拍電影及電視劇，強調題材會由雙方決定；而明年4月開台的nowTV年前亦率先開拍中港合拍劇《衛子夫》來迎合內地需求，似預見未來純港產劇已走向消失末路！
原本一心想做「電視大亨」的王維基會為香港影業界帶來新希望，短短兩年已拍了十七部劇集，包括口碑甚佳的《選戰》、《來生不做香港人》及《導火新聞線》等。不過，因為被「一男子」因素拖累至今仍不獲發免費牌，還有兩宗有關發牌的司法覆核案未了，加上港視最近的收視越跌越急，本周初播映的《末日+5》點播率僅餘二萬五千名用戶。
王宗堯嘆缺凝聚力
據悉王維基為免日日燒銀紙，已決定暫停一切節目製作，播完最後五部劇集（詳見附表）便「玩完」，預計9月24日最後會播出由林文龍、林嘉華等主演的《Night Shift》，之後只會播放外購內地劇來維持網購營運。其發言人昨在電話中說：「係會暫停製作，因為以每集一百萬成本計算，互聯網嘅廣告收入確實唔達標，支持唔到就寧願唔開拍，一切要等待官司有明確判決先有新進展。」
男神王宗堯昨在電話中無限欷歔：「末日咁囉，啱啱今日播我有份演嘅《末日+5》最後一集，好應景。」他直認如今的港視缺乏凝聚力：「一來冇宣傳，二來我哋個台可以睇嘅嘢越嚟越少，冇咗個希望。」可擔心港產劇沒落？他說：「劇集最重要係題材好，如果太遷就內地就冇咗香港味道。」周家怡則希望政府為港人着想，她說：「以前港劇係亞洲區首屈一指，其實韓國政府都幫咗影業界好多，希望香港政府鼓勵呢個行業，畀個機會佢（王維基）拍港劇。政改不獲通過咁嘅事都會發生，我相信幾冇可能嘅事都會發生，相信港劇會長存不息。」
陳錦鴻戥香港唔抵
面對低迷收視，林文龍有點愕然：「嘩，差咁遠？港視俾一男子打沉咗，所以都有心理準備佢死亡。但好多嘢又唔需要絕望，ATV夠以為有阿爺睇住，點知佢又死咗，好多嘢預計唔到。」與港視仍有兩年多合約的陳錦鴻，在《末日+5》客串演特首，他說：「我唔係戥維基唔抵，係戥成個香港唔抵，港人唔係農業或漁業社會，咁富庶環境下竟然都冇得揀，呢個先係我哋無奈嘅地方。」餘下其中三部劇都有份演出的林熹瞳則說：「老闆咁多鬼主意，可能佢秘密練兵，儲夠彈藥先出山。」
此外，港視首次以老人為題材的劇集《惡毒老人同盟》將於下周一接棒播出，劇中郭鋒與少妻有床戲，他笑言好耐未試過：「年輕時囉，之後多數都係病、中風都有床戲，哈哈。」對港視收視跌新低，他大嘆陰功：「唔拍新劇係可惜。」
採訪：嵐山
蘋果20年 企硬我敢言
http://20.appledaily.com
|
鍾意就快D Share啦！
|
|
|
