樂基兒大模畏踩過主持界
名模樂基兒（Gaile）今年宣布強勢回歸，一向是時尚品牌寵兒的她，短短兩個月已密密接job，穩袋百萬。日前她以索爆身段為《好報》拍攝水着，成為今期《東網Baby》「夏日心動」系列女主角。她透露有意在港置業，目標是背山面海的花園小屋。工作一浪接一浪的她，更首次殺入主持界，遠赴意大利拍攝旅遊特輯，實行多元化發展，努力實現夢想！
Gaile離婚後曾在美國老家及峇里生活，今年農曆年後，她重新投入工作，正式將基地搬回香港。在剛過去的春夏時裝開季月內，她出席了逾十個品牌活動，以保守估計十萬元一個出騷價，短短兩個月已淨袋百萬，逆市突圍。
初赴意國取景
有價有市的她，除了模特兒工作外，今年更首次殺入電視圈做主持，她說：「下星期會去意大利，同時裝設計師William（鄧達智）一齊幫nowTV拍攝一個全新嘅旅遊節目，係我第一次去意大利，又係我第一次做嘉賓主持，所以好興奮同期待！節目大部分會喺米蘭拍，我要去打工，去體驗啲牌子嘅製作過程，會去參觀佢哋嘅工廠、又會去酒莊同農場，我會試吓落手做，當學徒，做完佢哋會送番一樣最新嘅產品畀我，當係人工。」Gaile表示是一個全新嘗試，由於是第一次到訪意大利，所以會爭取時間閒逛和品嘗美食！
努力搵銀買樓
工作一浪接一浪，努力工作背後的原因，原來是為家人置安樂窩，她說：「喺美國讀書嘅妹妹下月畢業便會嚟香港跟我一齊住，佢好高好瘦，可以試吓做model，不過最後都係睇佢自己決定，無論點我都會支持佢！佢要時間適應香港嘅急促生活，暫時租樓住先，不過租金都唔平，所以如果佢鍾意，都會喺度買樓，但香港買樓都唔平，（有冇心水樓？）我鍾意海，最好住近海邊，或者可以背山面海，住郊區啲，（近海好貴o架喎？）所以就要畀心機工作啦，第時老咗我都諗住搬去海邊，日日滑水，哈哈！」
拍拖只求開心
Gaile是次為《好報》拍攝動感水着，成為今期《東網Baby》「夏日心動」系列女主角，當然要盡騷fit爆身段，與及一展滑水技術。由於她醉心滑水，故近日被運動品牌Roxy垂青其健康形象，邀她設計全新2016春夏滑水服。談及滑水，Gaile總是眉飛色舞，但對於感情事，就封口不提，只謂現階段拍拖是求開心，至於結婚生子，她就說：「我覺得生小朋友一係好早生，一係就好遲先生，好似外國好多女人都係四十歲後先做媽咪，依家醫學咁昌明，都好安全！」
採訪：Ada Lam
攝影：倪立煌、吳文聰
示範：Gaile Lai@Calcarries Models
化妝：Shuen @ Will Wong
髮型：Harry@IL Colpo
服飾：Roxy
|
鍾意就快D Share啦！
|
|
|