好多人都話外國嘅月亮特別圓，咁如果俄羅斯姑娘賣嘅麵包，又會唔會特別好食呢？
喺哈爾濱一個街市，除咗有嚟買餸嘅大媽大叔，仲有一個身高1米76嘅俄羅斯靚女，喺度賣麵包。佢叫卡佳，話想將俄羅斯美食推廣到中國，但知道兩地人口味好唔同，所以就嚟街市擺檔，藉此摸索當地人口味，之後再加以改良。呢度所有麵包都係喺哈爾濱工作嘅6名俄羅斯師傅整嘅，大約5蚊人仔一個，大媽都讚好味。
嚟到街市擺檔4日，卡佳已經同當地人打成一片。呢日由凌晨4點開始擺檔，擺足3個鐘，一共賣出近400個包，成績相當唔錯。睇嚟靚女真係有啲著數呀！
