Yumiko餵完人奶照煲煙
【大坑】現年33歲的鄭希怡（Yumiko），前年跟拍拖8年的化妝師男友梁學儲結婚，今年4月升呢為人母，剖腹誕下B女梁子柔（乳名梁浸浸）。女兒出生不足24小時，便因呼吸系統出現問題入ICU，令Yumiko擔心到喊，幸最終康復出院。Yumiko更戒煙戒酒，還自爆為了餵哺母乳，連月都飲一直怕腥的魚湯。不過，本報日前發現Yumiko煙癮起，當街吞雲吐霧，她昨晚向本報記者表示：「已停止餵人奶，因為梁浸浸健康好穩定。」
鄭希怡今年4月8日在港安醫院剖腹誕下女兒梁浸浸，本來與老公都十分開心，可是女兒出生不足24小時便因呼吸系統出現問題及有肺積水情況，要轉送東區醫院ICU，令Yumiko一度擔心到喊，幸好女兒留院兩星期終於可以出院，才令她放下心頭大石。
為女兒健康，Yumiko自女兒出生後，一直都以母乳餵哺，初為人母的她，不時都會在網上貼相分享女兒相片，又會貼她餵母乳要用到的工具，包括方便母親泵奶儲存的泵奶器。不過，本報日前卻發現Yumiko與老公在大坑嘆日本菜後，竟即刻點煙兼大啖索，煙癮似乎頗大，老公梁學儲則站在她身旁嘆雪茄，二人表情皆非常享受。
【大啖啜】
■Yumiko煙齡不短，她稱早前為愛女戒煙，但日前煙癮起，被發現在大坑後巷大啖抽煙。
【湊囡囡】
■日前Yumiko在微博貼相說帶女兒曬太陽。微博圖片
【嘆雪茄】
■梁學儲（左）和友人陪Yumiko煲煙之餘，自己也嘆雪茄。
【速點煙】
■Yumiko食完飯即走出餐廳點煙，煙癮頗大。
「餵咗兩個半月人奶」
當晚大約10時多，本報記者發現Yumiko夫婦與數位朋友在大坑一間日本菜餐廳晚膳，當時已是飯局尾聲，記者先見Yumiko由餐廳走出來，其老公及友人則緊隨其後，而Yumiko一出室外已急不及待用火機點煙，梁學儲最初都有左望右望，似替老婆把風，但最後都點起雪茄陪老婆一齊嘆。
本報昨晚聯絡Yumiko，問她可擔心餵哺母乳同時吸煙，會對女兒健康有影響？Yumiko即緊張回應說：「其實我有咗BB後已經戒咗煙、戒咗食生冷嘢同戒酒，餵咗兩個半月人奶，𠵱家已經停止咗，因為醫生話梁浸浸過咗10磅，𠵱家嘅健康好穩定，所以我哋都好放心。」
■Yumiko月前曾在網貼泵奶器，透露自己以母乳餵女兒。微博圖片
■Yumiko昨晚在社交網上載新買的奶粉機，證明她改餵奶粉。
■女兒出世後即入ICU，令Yumiko夫婦十分擔心。資料圖片
醫生：令BB吸入尼古丁
Yumiko又說：「嗰晚係同老公、朋友食，我真係好耐冇食過日本嘢，大家鬆一鬆啫！其實老公都戒咗煙，只係間唔中食吓雪茄，我哋返到屋企都一定會換衫先同個女玩，佢嘅健康我哋好在意，放心」記者昨日訪問家庭醫生關嘉美，對於餵母乳的媽咪吸煙，對BB有否影響，她表示：「如果餵母乳嘅媽咪吸煙就一定唔好㗎喇！因為唔單止會令BB吸入尼古丁，仲會有好多毒素。」
採訪：畢紹基
攝影：黃曉程
|
鍾意就快D Share啦！
|
|
|
