Yanki媽媽曾簽過多次做手術的生死狀，知道囡囡未能升讀本地大學也表現得相當高興，「佢身體健康最緊要，佢去台灣讀書我仲可以去旅行順便探佢，不知幾好！」
Main Camp
DSE失手 轉戰台灣大學 血癌女鬥士：我一定得！
中學文憑試（ DSE）上周三（ 15日）放榜，電視台新聞例牌講「接過成績單後，有人歡喜有人愁」，一邊影住成績差的同學抱頭痛哭；一邊影住班攞 5**狀元跳起 yeah，話自己想做醫生乜乜乜，一成不變。
不過對於應屆考生、十九歲的許欣琪（ Yanki）而言，即仗成績與大學入學最低要求（ 3322）仍有一段距離，她仍能處之泰然。
只因 Yanki四歲患上血癌，小五時第三次癌症復發前，婆婆和爸爸先後離世，許媽媽為照顧女兒更放棄自己的小生意，十多年來出入醫院照顧囡囡。經歷過生死邊緣， Yanki直言 DSE真係濕濕碎， Yanki早已報了四間大學的社工課程及台灣的大學， Yanki好開心話：「台灣東吳大學社工系收咗我，四年後可以返香港讀社工系碩士就可以做註冊社工，我一定得嘅！」
Yanki四歲患上血癌，童年都在醫院度過，她自言卡通片比其他小朋友看得多，因為在病房裏不是睡覺就是看卡通，日子難過得很。在小學階段，欣琪血癌復發過三次，「我一星期最多返到三日學，隔日就要請假，有時上上吓堂會暈要入院，不過我小學成績唔錯，入到精英班，以前媽咪對我成績要求好高， 80幾分都又罵又打，但電療後記憶力轉差，上堂會好易攰，對得電腦耐對眼會好澀，成績點都有影響。不過同學都好好又好肯教我，就算我光頭去學校都唔驚。」
病剩 70磅
「我十歲個年，醫院要我抽骨髓驗，我就知今次大鑊，不停喊，唔肯去醫院，以往電療化療都做過晒，甩頭髮都習慣，但知道要抽骨髓真係好驚，唔係怕痛，係知道復發過幾次，知道生存機會唔大！」幸好找到適合欣琪的骨髓，移植骨髓時兩個月沒有進食，單靠營養液維持生命，令體重暴跌至 70磅，雖然 Yanki現已完全康復，但有骨枯及白內障兩種後遺症。
經歷過生死邊緣，升中後的 Yanki希望可以將勤補絀，補習又狂溫書，「我讀間中學（沙田呂明才）好勁，又係英中，自己能力真係未到，我早就預咗自己入唔到本地大學，所以一早睇定台灣啲大學，一嚟台灣近，阿媽探我都方便啲；二嚟台灣學費平，一年唔過三萬蚊，阿媽負擔冇咁重。我去到會住喺學校僑生宿舍，先適應咗生活先再搵兼職。」
一心讀社工
Yanki事事早就做好準備，許媽媽說：「欣琪一早搵晒資料報定名一心讀社工。雖然佢自己唔滿意個成績，不過我好滿意喇，出國去台灣讀大學喎，已經叻過媽咪」 Yanki又堅持回港再讀碩士，誓要取得註冊社工的資格，「我一定得嘅！太多人幫過我啦，我都想透過自己嘅經歷幫人！」
成績好都唔讀醫
個個狀元都揀醫科，不過有兩個高材生就例外，以理學院為目標，原來呢個時代仲有人真心想做科學家！
來自男拔萃 17歲的雷千泓（ Owen），憑住歷年參加科學比賽的成績同海外科學交流的經驗，成功打動科大理學院破格取錄，成為第二位毋須應考 DSE而直接取錄的學生。他希望可以繼續做科研，做個成功的科學家。
|
鍾意就快D Share啦！
|
|
|
