爆大台新聞部似地獄 陳珍妮激動：我只希望留住條命咋！ [FACE - 426] 陳珍妮,MF,

爆 Like王

爆大台新聞部似地獄　陳珍妮激動：我只希望留住條命咋！

前新聞主播陳珍妮（ Jenny）出書《 TVB新聞部血淚史》，爆大台新聞部欺壓主播，高層以打擊下屬為樂，陳珍妮曾經喪喊、失眠，要靠血清素治療，訴盡做主播的辛酸，雖然想忘記反而記得更緊！

Jenny接受訪問時難掩悲傷：「我本來想用開心嘅心情去做呢個訪問，但諗番起都忍唔住！」愈講愈激動：「如果我冇捱過呢件事，我應該死咗喇！……所以我 unfriend晒啲我唔想再接觸嘅人，其實我只希望留住條命咋！」 Jenny絕非冰山一角，究竟仲有幾多主播喺度苟且偷生呢？

F：《 FACE》　 J：陳珍妮

F：你喺書中寫高層以打擊下屬為樂，仲有冇其他實際例子？

J：除咗着短裙都出過事之外，會覺得你係唔識寫稿、冇資格攞獎學金，認為你冇能力做某啲工作，例如我都會出去跑新聞（採訪工作），試過有隻故仔係關於教育嘅，我有 source我想做，但佢（高層）話呢啲係港聞記者跑嘅，你一係交出嚟，一係唔好做，結果冇做。每日都好似喺地牢咁，唔知自己做咗乜事，呢個又話你、嗰個又話你，明明自己好努力，佢都唔滿意你，點做都係錯，咁你想我點啫？（有啲人識擦鞋着數啲？）人夾人緣啩，實有啲人係咁，都冇辦法！

陳珍妮寫書爆大台新聞部不公、養懶人、針對下屬，雖然喺大家公司都會發生，但你夠唔夠膽寫出嚟先？

Jenny曾經誤將總理李克強叫咗李克勤，佢喺書中亦有提呢件事，更指只係一個字就令佢損失咗其他出鏡機會。電視畫面

陳珍妮鮮有同其他主播合照，可見喺大台真係冇乜朋友；佢亦唔願意透露同邊個仲有來往，唔想牽連其他人咁話。網上圖片

F：有啲前同事批評你翻舊帳喎！

J：其他人未經歷過我嘅事，覺得我 EQ低，我想講好多行嘅人都係咁，但做咩要覺得有情緒病嘅人係弱者先？唔通你鬧啲病人做錯，係你身體唔爭氣啫？我入去做嗰陣係個好健康嘅人嚟，如果我冇辦法捱過呢件事，我應該死咗我離開之後，用咗一個月去澳洲散心，買張機票就走，去到無所事事，跳吓舞餵吓白鴿，完全想忘記呢行嘅人，所以我 unfriend晒啲我唔想再接觸嘅人，其實我只希望留住條命咋！

陳珍妮喺新書爆，主播 W同 M喺酒吧識咗兩個男人，只係 25分鐘， M就同男人狂咀；又爆 M曾經有個富貴男友，分手後同明星仔拍拖；但訪問當日 Jenny堅拒透露邊個係 W同 M，叫讀者自己估。

F：前主播林昭儀暗指你出書「丟架」，怕唔怕得罪舊同事？

J：佢都唔知我講邊個我都冇開名。𠵱家香港仲有出版自由係咪？呢啲經歷係我個人嘅經歷，唔通有人出書影射我但冇開名，我又話佢丟架咩？如果我本書只係講 ABC不是，咁我就係講是非，但我用半本書去講自己經歷、挫折，不如你諗下點解先！難道我天生就係俾人睇低，永遠係錯？大家喺呢行應該見過好多世面，應該有啲同理心囉！以前我去訪問啲邊緣人、變性人，之前都對佢哋有有色眼鏡，但訪問後發現佢哋好好人，我都懺愧！何況行家都落井下石，有啲唔開心囉！（索性寫多本）再寫我俾人淋漒水喇！

Jenny新書喺書展推出，上週四（ 16日）舉行簽名會，粉絲都有安慰同鼓勵佢。

F：點解離開咗大台 3年至出呢本書呢？

J：曾經好想忘記晒呢間公司嘅嘢，本來係想寫小說，一個關於我自己嘅故事，主角都係呢行嘅人，諗好晒橋段，但偽文豪（去年書展出書爆大台 PA辛酸史）話不如寫番我經歷先啦，就出咗呢本書。我寫大綱嘅時候，我喊，佢話既然你真係咁痛苦又覺得自己啱，更加要寫出嚟。我寫得好快，原來我冇放低過，仲喺度，只係我逼自己去忘記。其實呢幾日都好唔開心，俾記者不斷去追問嘅時候，我將所有痛苦再行多一次，講起都想喊！

鍾意就快D Share啦！

下一篇 》