八卦陣
TVB前主播出書鬧雙胞 劉銳紹小說爆政壇醜惡
書展週三開幕，兩位前 TVB新聞主播打對台出書，一本係由陳珍妮（ Jenny）寫嘅《 TVB新聞部血淚史》，另一本係高芳婷嘅《 7年滋養》。兩本都係講舊公司，不過佢哋筆下嘅新聞部睇嚟好唔同。
Jenny話本書記錄佢喺 TVB工作三年半嘅工作挫折、同事關係、同埋佢喺新聞部嘅感情生活。佢話全部真人真事，不過書中人物就唔方便開名。本書一開首就講佢喺 TVB最後半年嘅工作壓力太大，瞓覺要靠安眠藥，後來佢轉做市場推廣工作，同客串做網台主持，輕鬆得多。對於有唔少關於主播嘅內鬥傳聞， Jenny本書又會唔會提到呢？「有少少，但真心搞事嘅人唔多，一啲啲。」真係好想知有邊「啲啲」喎。另一位前主播高芳婷身在美國，佢電郵回覆話喺 TVB工作七年半，有好多難忘經歷，希望記下美好時刻。兩位作者都會喺書展舉行簽名會，同一辦公室，一個形容美好，一個話血淚，究竟讀者鍾意邊個 TVB？好快就揭曉。
每年書展都推出政治書嘅次文化堂，負責人彭志銘今年推介時事評論人劉銳紹（夫子）嘅小說《慾奴•牢獄》，係夫子第一本發行嘅小說。夫子曾經喺《文匯報》做記者，見證中英談判同香港回歸，入行四十三年，耳聞目睹好多政圈荒誕事，成為呢本小說嘅內容。書裡面兩位主角，一個爭做特首；一個爭全國政協，描述佢哋點樣去獻媚。其中一節係特首候選人被發現有私生女，要同中央交代，係咪似曾相識呢。夫子強調唔好對號入座，不過有唔少內容都係真事，其中講到送禮物俾大陸政要，都大有學問，佢話喺三十年前，送禮者考慮到老人家打麻雀不用彎腰，於是送電動麻雀機。亦有人搵番戰亂時期嘅《新華日報》講共產黨威水史，俾啲元老重溫昔日光輝。而中英談判後，落實香港回歸中國，有啲港英遺臣為咗討好新主北京，就出賣港英前朝嘅資料。
夫子喺二○一二年正式執筆，有咩刺激佢要打開潘朵拉盒子呢？佢話一二年後，即係梁振英上台後，香港政治文化比以前更傾斜，擦鞋文化、用人唯親，毫無顧忌咁出現，令佢決心要寫出官場百態，俾公眾思考。被問到書嘅內容有幾分真假？佢就賣關子：「如果你熟背景，會睇到真內容唔少。幾成真假，你睇完話我知。」
今年十一月區議會選舉，想知今屆區議員表現成點，不妨參考林子傑嘅《十八益人》。佢花咗兩年多時間走訪十八區區議會，了解佢哋點樣花費政府每區撥款一億元。佢話身邊唔少人批評區議員做唔到嘢，佢就反問番，有幾多人真係關心自己區議會嘅工作？所以決心跟進呢一億點用。
佢話搜集資料期間，建制派議員都好樂意講佢哋嘅構思，並唔係外界覺得建制派會收收埋埋。而咁多區嘅構思中，佢大讚葵青區將一億花喺長者健康項目上，俾該區長者受惠。其實好多區只係通過構思，未正式攞到撥款，仲有排跟進，不過因應今年區選，佢就提早發放十八區成績表，提醒公眾一齊監察。
老胡巡啟德 睇「豆腐渣」項目
九龍灣啟晴邨鉛水醜聞愈揭愈臭，不少人都記得前國家主席胡錦濤曾於三年前到訪視察該邨，但原來老胡當年喺啟德發展區視察過兩個項目，建成後俱發生質量及混亂問題。
一二年六月底胡錦濤訪港，為 689主持宣誓就職儀式，當時他先到啟德郵輪碼頭參觀，由時任特首嘅曾蔭權和發展局局長林鄭月娥陪同，聽取啟德發展區嘅規劃概念。
經老胡踩場後，耗資逾八十億興建嘅郵輪碼頭可謂多災多難，包括啟用前被揭發接待大堂及天花多處嚴重漏水，啟用後又出現交通混亂和鼠患問題。
至於胡錦濤巡視啟晴邨，大家當然會記得他在窗前向現場工作人員和記者揮手示意一幕，但及後該邨因工程延誤而延遲四個月入伙，入伙時質量問題嚴重，包括水喉滲漏、熱水爐生銹、廁所門未能關上等。撫今追昔，相信好多人會質疑，煲呔當年竟敢安排領導人睇「豆腐渣」項目，難怪佢一直備受貪腐醜聞困擾。
李慧琼「扯貓尾」有前科
上週四梁振英出席本立法年度最後一次答問大會，同民建聯主席李慧琼「扯貓尾」，成功上演民建聯成功爭取全城清潔運動一幕。我哋翻查過去資料，發現 Starry原來幫 CY搭台早有前科，仲要係度身訂造嗰隻。
一男子上任三年，舉行過十三次答問大會， Starry只係提問咗三次，初試啼聲就喺 689發表首份施政報告翌日，當時劈頭第一句，佢已話「我非常認同行政長官就經濟部分所提出嘅內容」，跟住要求對方答如何幫泛民返大陸了解情況，俾靚位 689表演。
至於餘下一次，就係 CY舊年被菲律賓總統阿基諾三世「玩謝」之後，當時琼子就問：「你可否利用這個機會，向全港市民交代一下你嘅部署和想法？」你話條貓尾無扯到，都好難有人信。
|
鍾意就快D Share啦！
|
|
|