豪語錄
交番俾你講體育嘞 伍家謙
計劃要理性周詳，臨到決斷，畢竟靠感性衝動。伍家謙固然有趣，但觸發今次專訪，是我偶然收到 email，預告伍家謙將於書展登台，演繹童話故事。
咁都得？
係，我思海即時只浮起「咁都得」，手指已經撥電話去邀約。
若說由體育記者變身藝人、開公司搞網必須有噱頭，伍家謙是做到了。當然，我不認為講講童話或《豪語錄》能帶挈伍家謙什麼；但傳媒在轉型、經濟在轉型，蝴蝶效應猜不準，點只「波係圓嘅」（他師父伍晃榮名言），仲會有第三波、第四波……
伍家謙說：「你對上一次幾時睇手機？對上一次幾時睇電視？對上一次幾時睇報刊？」
對，是五分鐘、五小時甚至五日的分別。鑽唔出「咁都得」的頑石腦袋，頂多由寫體育轉型寫娛樂，這個我最清楚。
因為我都做過體育記者。
第一波：文字
傳媒轉型並非齋噏，這天適逢五十六年《新報》停刊，它是伍家謙第一份工。
「有人話係紙媒警號，當然可惜，我後來轉做電視、現時搞網，仍習慣寫草稿打磨，對白紙黑字有感情。比我年輕的朋友，有些聽都未聽過《新報》；聽過，便因為今次。
「當年仲讀緊新聞系已入職。有個公務員告訴我：『一個月廿九日都唔開心，只得出糧嗰日開心。』我寧願做體育記者，廿九日都開心，係出糧嗰日冇咁開心。」
伍家謙身穿傳媒代表隊球衣，貨真價實印有他名字，卅四歲仍屬當打之齡，可想而知起初因何擇業。
「已不單興趣，直頭係球隊師兄介紹我入去。做體育記者是否要叻體育？我唔叻，但熱愛，相信能更加理解到件事。
「體育講公平、有益身心，所以報導體育消息本身已對社會有貢獻。」
那麼，伍晃榮最愛什麼項目？
「賽馬。」伍家謙即刻答到你。
已故的伍晃榮是他恩師，甚至誤傳過是父子，伍家謙所言沒帶不敬之意，年長便明白，興趣不能當飯食。
紙媒體育記者有幾難撈？看曾經只得一個名額就知（後來乾脆從缺）。伍家謙在《新報》既不甘心只翻譯外電，又不想寫波經做明燈，○四年轉任電子傳媒，正途。
第二波：電視
我們認識伍家謙因為《六點半新聞》，更因為巧合在姓氏。
「交番俾你講體育伍……」電視汁撈飯，一老一少像世代相傳每晚在政經大餐後端上甜品，連觀眾都戥他們密不可分。
「伍生教我，別睇小自己報體育。天災人禍新聞永遠只做到發生之後的事，好少拍到撞車嗰吓；但體育是，有前瞻期待、有齊成個過程、有悲歡離合，看你如何濃縮、整理的功夫。」
一般認為，伍晃榮和伍家謙全賴風趣生鬼台詞——其實，成功之道怎會咁簡單？
「伍生是靠人生閱歷，幾十年甜酸苦辣令觀眾共鳴。我講一句『波係圓嘅』就唔會咁有說服力，我是站在年輕體育愛好者去感受，加上狂查資料。低俗做不長。」
十一年生涯的確夠長。
「最難忘○九年東亞運，港足奪冠，班球員與我同期成長，一直被睇小，終於吐氣揚眉，我歡呼着採訪，與他們慶功，齊齊諗明天會否登上頭版。
「點知，當晚有個傻佬在銅鑼灣掟鏹水，一半報紙換了這條上頭版。」
苦心孤詣，還得看瘋子式衝動。
第三波：上網
「離職 TVB諗過幾次，呢行就係咁，四年一度奧運，四年一度世界盃，大賽鬥完，球星賺夠一世，記者是否做一世呢？但每兩年高潮（奧運與世界盃梅花間竹），又吸引我『做埋下屆先啦』。
「計劃可以幾周詳都未實行，一四年結婚，衝動來了，再不創業等何時呢？過幾年父母退休，自己又會有兒女負擔，於是，我今年一月正式往外闖。」
體育新聞其實不小眾，睇歐洲波和 NBA就知；小眾在本地。
「最近足球外圍賽，靠本土意識炒熱，但個餅，始終冇大到。香港各項目唔算差，要獲取國際獎牌，即係至少東亞地區入三甲啦，就難免有中日韓三座大山在前，不應該太苛責自己人。
「我在 office剪片，同事路過見到是港隊總嘲笑，到近排外圍賽便大大聲嗌加油撐港隊——真正的支持唔係咁啩？」
伍家謙搞網，主力在於比以前更隨心所欲地介紹本地體壇人和事，他說，是他永遠的本業。
「我在專欄寫過，『撐』，係很重很重的字眼，要不計成敗好醜，大家做得到嗎？」
第四波：個體
係㗎，文字時代終結，電視時代尾聲，甚至電腦上網也 out out哋，剩番手機 apps，下一浪 sell什麼？不如 sell自己。
所以，伍家謙日趨明星化。
這是弔詭命題。眾所周知，唯獨 TVB主播具條件明星化，但 TVB新聞部嚴禁明星化（其他電視台倒事倍功半恨都恨唔嚟）。
「接拍廣告，我問點解搵我，主辦商話：『只睇慣正面，一個側身亮相已經有新鮮感。』是過往累積而成的神秘面紗，揭開的一刻有些爆發力，但揭開之後不會長，要靠後勁。
「係，同一時間幾位主播離職，我相信並非過橋抽板，一心諗住當作明星踏腳石的，冇料到，起初根本捱不上主播。
「但的確，我到大學新聞系講 talk，女生會一面聽書一面補妝。」妹妹仔視伍家謙有如
星探。
以前，甚少出現主播轉行的話題，陸嘉敏、蘇凌峰掛咪便移民（以至伍晃榮移民天國）， one life one team，一退全退，神龍見首不見尾，才是真正的新聞男神女神。
「我們這一代，邊有得咁瀟灑？」伍家謙補着妝說。
JOB
我和伍家謙一樣，起初做《新報》，那時考筆試應徵的，剛離開校園的小子，有什麼比揸筆答卷更稍具把握？適唔適合我不管了。我需要一份工。
我和伍家謙一樣，做過體育記者，與伍家謙不同，在此之前，我未現場睇過賽事，喜唔喜歡我不管了。我需要一份工。
然後某天，大老闆說：「本地體壇咁艱難，你寫運動員血淚史啦。」於是我改為「人訪」記者，「人訪」究竟算邊科我不管了。我需要一份工。
訪問運動員不如訪問藝人，於是我改為娛記，做娛記是否跟初衷距離太遠我不管了。我需要一份工。
近排《豪語錄》拍片上網，文字瀕死，我作為發問者，難保有天要陪被訪者粉墨登 apps——咦，搞搞吓，我豈非似番伍家謙？但與他不同，我是臨老沒丁點 camera face去面對。
伍家謙重複：「你對上一次幾時睇手機？對上一次幾時睇電視？對上一次幾時睇報刊？」
今趟，我未必等得到那天去諗管不管了。份工仲需唔需要我？
|
鍾意就快D Share啦！
|
|
|