直擊百日宴 洗米華按摩氹正印 [壹週刊 - 1330] 洗米華,周焯華,M1,

入場時 cool爆嘅洗米華，在場內卻主動幫老婆按摩，好熱情。

探熱針

直擊百日宴　洗米華按摩氹正印

澳門賭業猛人周焯華（洗米華），上月又被爆與 Mandy Lieu遊首爾，不過每次出埠玩完，返到屋企，又做番好細心人夫，補鑊冇限 loop。

日前正印小米女百日宴，周焯華公然餵老婆飲酒，又攬住影相，成功修補關係，全因一招按摩功！

以柔制剛

自從正印同 Mandy Lieu前後腳生女，三個月來，無論正印洗米嫂如何不聞不問，甚至在機場上演 fing開老公的冷水場面，但周焯華依然屢敗屢試，努力氹番老婆，保住頭家。

補鑊考耐力，終於見到成績！上週日（八月三十日），正印小米女周羨潼（ Damiana）百日宴，夫妻關係，已見有改善。

周焯華為正印小米女，在澳門豪花百萬搞池畔派對，更同洗米嫂影恩愛合照，成功破冰。本刊直擊當日池畔派對，入場前，一家五口大合照，面對傳媒，周焯華 cool爆，與家人企到離行離列，但入場後，卻是另一回事。

Party開始，洗米嫂滿場飛招呼親友，對小米女 Damiana極痛錫的周焯華，則留守 BB車旁，不時𠌥低身，呵住 B女。各自周圍招呼親友後，兩公婆終於有機會一齊坐低，不過洗米嫂只顧與同枱的女友人吹水，完全冇理會在旁的老公。正印冷待，但周焯華唔理咁多，出手在老婆膊頭按呀按，按完又𢱑背脊，按摩神功維持半分鐘有多。老公做晒主動，當刻洗米嫂冇厘反應，你有你按，我有我同人傾偈，但之後都係心軟，笑晒影破冰合照，百日宴唔再黑老公面，周焯華以柔制剛，「軟功」得米！之後不時攬住老婆影相，機不可失。

受落嘅洗米嫂，俾老公破冰攬住影合照。

按完又幫佢𢱑背，認真好服侍。

百日宴兩公婆破冰。

按摩功得米，食住上嘅洗米華餵埋老婆飲酒。

洗米華不時走近 BB車呵小米女，翌日飯局又肉緊嘴嘴，小米女羨潼甚得爸爸歡心。

親友個女，洗米華都踎低摸面珠， cool爆嘅佢，對住細路變慈父。

派對翌日同大女慶生，洗米華戙高腳唱生日歌，好豪邁。

剪髮示好

據悉，在百日宴前夕，洗米嫂態度已經開始軟化，更專登換了個金色短髮 look，向老公示好。

「幾年前 Heidi試過短頭髮，華哥好鍾意，之後 Heidi留番長，華哥想佢剪番短，但氹咗幾年佢都唔肯。點知百日宴前一日， Heidi忽然剪短啲頭髮，佢明知老公鍾意佢呢個髮型，嗰晚華哥真係不停猛讚老婆好睇。個老公不停補鑊氹，做女人點都心軟嘅！」知情者說。

祝酒後，洗米華繼續攬住老婆招呼客人。

著上三點式嘅梓潼，跟媽咪一樣穿臍環。

同繼母感情要好嘅柏豪（黃箭嘴），當日介紹成班同學俾洗米嫂識。

除許志安，當日現身仲有 Yumiko同劉浩龍，劉仲上台同魔術師玩遊戲。

撰文、攝影、攝錄：娛樂組

nextplus.nextmedia.com

鍾意就快D Share啦！

下一篇 》