返港敍天倫兩星期，上週霆鋒推住大大個紅白藍膠袋返北京，與王菲迎接 35歲生日。
探熱針
正日留俾王菲 謝霆鋒紅白藍返京
同王菲世紀復合後，大部分時間寄居女友北京寓所，朝夕相對的謝霆鋒，八月初因為老豆謝賢大壽，加上前妻張栢芝帶住 Lucas和 Quintus返港定居，兩個仔要開學，霆鋒唯有交人，從北京返港兩星期；撞正王菲四十六歲生日，亦只好約埋老友趙薇陪歐遊。上個禮拜，輪到霆鋒三十五歲生日，做完「親子騷」，拿拿臨鬆人，撲返北京陪王菲。
親自下廚
八月二十九日正日生日要留俾王菲，謝霆鋒返港兩星期交足功課！賀老豆謝賢大壽，轉頭又要陪發高燒入院的細仔 Quintus，仲親自下廚煮大餐，提早三代同堂食生日飯。人子人父天倫樂後，已急不及待，人肉速遞返北京，與女友迎接三十五歲生日。
「 Lucas同 Quintus十二號開學，栢芝開到口，霆鋒點都要陪吓兩個仔，加上八月九號係四哥（謝賢）生日，所以霆鋒根本走唔甩，嗰兩個禮拜，隔日就三代同堂活動，搞掂晒啲手尾，佢就即刻撲返北京。」知情者說。
兜圈巡視
上週二（八月二十五日），霆鋒由香港飛返北京，推住大大個紅白藍袋出閘的他，匆匆登上坐駕，直返王菲位於東三環的亮馬橋外交公寓。
兩個禮拜冇見，二人足足兩日未有外出；直至上週四，才各自出門。
下午三點，霆鋒同助手坐車出發去銀行；另一邊王菲則出車到郡王府旁的黔香閣，相約友人晚飯。
上週六（二十九日），霆鋒生日正日，二人先後派出兩部保母車在屋苑附近兜圈巡視，發現有記者守候，兩架車遊花園一輪，最終惟有放棄，留守家中慶生。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
