任斐琳鬥靚專家 失言倒米
【陳柏宇佛山直擊】亞姐繼上月深圳站，昨日移師佛山面試，上次深圳站出現的凸腩、巨籮、腰有拔罐印等攞膽佳麗今次大為減少，反而樣靚、大波、高學歷等高質佳麗湧現。不過仍有佳麗露毛、表演舞蹈時跌親，更有佳麗行蟹步，延續亞姐面試定必笑破肚皮的傳統，其中不慎露毛的(29)姚俊如獲「一見鍾情大獎」，(18)任斐琳自誇選美經驗豐富，但卻失言指今次選亞姐的平台「好有問題」。
被喻為「末代亞姐」的《第二十七屆ATV 2015亞洲小姐競選》昨日舉行佛山站海選面試，29位佳麗穿比堅尼見評判，相比上月深圳站凸腩、腰有拔罐印等駭人質素，佛山站取消即場面試，要篩選過才讓佳麗見人，終於似番選美。
今次樣靚、身材好、高學歷等高質佳麗大不乏人，未知是否受「十優港姐」麥明詩坐上港姐寶座影響，昨日的佳麗中有23位擁大學學歷，其中4位更是碩士，算是替亞姐省靚招牌。(4)唐君嬈、(11)陳小紅、(12)唐穎、(18)任斐琳及(29)姚俊如，堪稱五大美人，擁模特兒身材的姚俊如不慎露毛，令自己更出位，而樣子標青的唐君嬈出場時獲不少掌聲。
譚霞港大碩士
(15)頓滿、(21)馬楠、(23)石延睿及(25)譚霞，則以豐滿上圍壓台。大會現場頒發4個獎項，「評判最讚大獎」、「甜美笑容大獎」分別由譚霞及貌似高海寧的頓滿奪得，(5)徐一博獲「最佳表現大獎」，露毛佳麗姚俊如獲「一見鍾情大獎」，可謂實至名歸。有碩士資格的譚霞以廣東話受訪：「我喺港大讀完物流管理碩士，（點解選亞姐？）對香港好了解，鍾意香港生活，亞姐係我嘅夢想，想圓夢。（想入娛樂圈？）有機會都想，（唔怕選完亞姐冇嘢做？）唔會，對亞姐好有信心！」
任斐琳自報三圍34、24、36後，似想以選美界履歷震懾其他佳麗，可惜失言，她說：「我參加過好多選美，2013年選世界旅遊小姐獲廣東賽區冠軍，2014年選洲際小姐得到華南總冠軍，選亞姐希望提升信心，不過今次平台好有問題，（想倒亞姐米？）我意思係因為亞姐質素好高，有內地又有國際嘅佳麗，壓力好大，我喺後台見啲女仔質素都好高。」
最巨胸的馬楠身材比例不夠完美，行路時胸部像放了兩團巨型布甸，震盪畫面過於震撼，被問最滿意身體哪部位，她反問：「你覺得呢？」之後卻大談護胸心得：「食木瓜冇用，按摩先有用。（男友幫你按？）依家冇拍拖，自己按，拍拖嗰陣未知按摩有用。」
12月決出冠軍
亞視副總裁趙汝強讚佳麗質素好：「今次比深圳站毀譽參半好好多，相信會有超過20位佳麗入圍。今屆會有100位佳麗入圍，佢哋會各自拍攝自拍片，10月起喺亞視播出，係亞視未試過。20位內地佳麗同20位外地佳麗於12月18日選出8強，喺12月20日再選出冠軍。」對於「亞姐之父」葉家寶缺席，趙汝強謂：「珠海站佢有去，（傳佢被調職？）到今日佢仍然係執行董事，即使日後有乜變動，相信佢一定能勝任。」
|
鍾意就快D Share啦！
|
|
|