無綫兩位當家花旦胡杏兒和徐子珊相繼不續約，反而為生仔停工兩年多的陳茵媺最近就全面復工，不過拍的不是無綫劇，而是首次跳入大銀幕，接演由杜汶澤執導的賀歲片《開飯喇！》，最近已飛往馬來西亞開工。
據悉，陳茵媺原來於兩個月前已約滿無綫，但她一直保持低調，全因要顧住老公陳豪飯碗，因為陳豪仍是無綫包薪合約藝人。最近有傳杏兒因不畀面老闆陳國強續約而遭無綫封殺，陳茵媺不想老公左右做人難，所以即使日前在港出席護膚品牌活動，她都沒有刻意提及離巢消息，但就不時更新微博與粉絲互動，昨日凌晨12時她寫着：「Nite nite……」
陳茵媺在休養期間一直「唔夠騷」，她在無綫拍的最後一部劇，已經是前年與陳展鵬、洪永城、林夏薇等，飛馬來西亞取景的《單戀雙城》，當時陳茵媺已經懷有大仔陳梓樺（Aiden），拍完這部劇之後，她更兩年抱兩，今年2月再誕下細仔陳浩鋒（Nathan），其間都一直冇拍劇，只是間中出席簡單輕鬆的剪綵活動，以及接拍廣告代言工作。有指陳豪要代老婆「孭數」，對於傳聞陳豪未作否認，曾笑着回應：「可以嘅咩？」但最終仍是加簽一年短約。
其實陳豪對公司不是沒有離心，為養兩個仔和供樓，有傳每月開支高達40萬，所以兩公婆一直有為將來籌謀。前年大仔剛出世，已盛傳陳豪想跟當時其無綫經理人陳嘉莉和楊怡自組公司，北上掘金，不過嘉莉一直去向未明。而明年4月，免費電視將會有一番新景象，亞視落幕，電盈登場，除有線寬頻的免費牌正在審批外，有新財團注資的亞視，以及亞視前主席邱德根之子邱達昌與何超瓊等成立的永升（亞洲），亦有意申請免費電視牌照，加上內地數碼媒體公司樂視又大舉進軍香港市場，令未來電視製作競爭加劇。
據了解，陳豪的合約將於明年初約滿，與佘詩曼的合約期差不多，不少藝人都靜觀其變，以拖得就拖姿態，寧願keep住自由身，等到有好價錢、好發展及好劇本等才再慢慢落決定，所以陳豪亦隨時會跟隨老婆陳茵媺不續約。陳豪透過短訊回覆，未有否認陳茵媺約滿消息，他只說：「sorry private details cannot be expose.（唔好意思，暫時唔可以披露詳情。）」至於陳茵媺至截稿前仍未回覆，但其契哥麥長青昨則在電話中說：「我唔係咁清楚，只知佢家喺馬來西亞開緊工，我自己仲有好長合約。」
陳茵媺同陳豪兩年抱兩，恩愛非常，有傳陳豪幫老婆「孭數」。（資料圖片） 
《開飯喇！》除咗有陳茵媺同杜汶澤外，仲有農夫嘅C君合演。（互聯網圖片）