2015年9月1日 星期二

洪永城食炸雞飲可樂 同唐詩詠報平安 唐詩詠,洪永城



【無綫角度嘅北韓...】洪永城食炸雞飲可樂 同唐詩詠報平安

2015-08-31 23:30:00



(電視圖片)

無綫早前宣傳即將推出嘅有關北韓嘅節目《在那遙遠的地方.北韓》,因為網頁強調「探索在國際媒體的報道背後,北韓人最真實一面」,加上主持洪永城讚北韓「發展得幾好」,令香港嘅脫北者關注組織轟無綫為北韓塗脂抹粉,質疑節目真實性。

節目預告就見到洪永城又玩滑水梯又打波,好似好開心咁,今晚播第一集,究竟無綫除咗做CCTVB,係咪做埋北韓喉舌?第一集,都有少少基本歷史背景,講南北韓因為戰爭分裂成兩個國家,亦同好多高登仔嘅北韓遊記一樣,係一日一日行程咁講,最先一定係講由北京去到邊境新義州,佢哋講到明係向北韓申請官方VISA拍攝,所以佢哋當然好乖乖,唔會亂拍啦,不過成個節目都強調,好多地方唔影得,其實的確顯示北韓真實嘅一面---一啲自由都冇。

平壤靚靚大廈,其實入面冇人住,只係俾外人睇有幾光鮮,呢啲對有北韓小小認識嘅人都知道,而呢個節目其實都有講,佢第一節主要係精選節目咁,出咗好多「平壤生活」片段,有好多佢好似同當地人打成一片嘅片段,洪永城仲打俾緋聞女友唐詩詠報平安添!

個節目第二節先開始講第一日行程,都講到明唔俾影軍人,食飯食美國炸雞同美國可樂,戲肉去玩水同打波等等都未出現嘅,片段中見到同洪永城一齊打波係有外國人,其實北韓都住咗一批申請過去做嘢嘅人,多數係申請教書,而且有教會背景,而去得呢啲地方,食得呢啲食物,喺北韓當然係特權階級先可以享受到啦!

而HKTV製作嘅《飄》,中間有加插北韓偏遠地方發生飢荒嘅舊片段,TVB暫時就冇嘅!咁洪永城去呢啲地方你又唔可以話佢唔真實,不過可能要加返個註腳,叫北韓特權階級最真實嘅一面喇!



向北韓官方申請的拍攝VISA(電視圖片)



閉起雙眼...去咗北韓最掛念誰? 洪永城當然掛住唐詩詠啦 (電視圖片)



北韓有幾多小朋友有資格讀書呢? (電視圖片)



北韓有幾多%嘅人可以去到呢度?(電視圖片)



有幾多人又有得打波? (電視圖片)



TVB模擬美國炸橋情境 (電視圖片)



洪永城去到北韓,享受特權階級先可以享受嘅資本主義國家食物---炸雞。(電視圖片)



酒店房,佢話最驚人偷聽 (電視圖片)

鍾意就快D Share啦!