家中跌倒冇人知 78歲夏萍留醫
現年78歲的無綫資深演員夏萍，自第二任丈夫過身後一直過着獨居生活，前日上午夏萍在家中不慎跌倒受傷，一直無人知曉，直至晚上8時許無綫同事致電閒話家常，才揭發意外發生，並即時致電報警召喚救護車將夏萍送院治理。目前夏萍仍留院觀察，慶幸未有骨折。
粵語片時代當紅花旦、演過周星馳、吳鎮宇等無數紅星母親的78歲資深演員夏萍（Apple姐），前日上午9時許在淘大花園寓所不慎跌倒受傷，全身動彈不得。據知Apple姐與首任丈夫所生的一對子女關係疏離，鮮有聯絡，自Apple姐第二任丈夫張雲91年過身後，她一直過住獨居生活，只聘請鐘點工人打理家頭細務，而她雖有平安鐘，但又未有將平安鐘擺放身旁，以致前日上午跌倒受傷後逾10小時也無人知曉。直至當晚8時許，無綫藝員部同事一如過往致電問候Apple姐，始揭發她跌倒受傷，於是急召救護車將她送往聯合醫院救治。據悉Apple姐照X光後，身體雖多處有瘀傷，但未有骨折，目前留院觀察。
■獨居的78歲夏萍前日在寓所跌倒，十多小時後被送院救治，昨見她情況穩定精神不俗。
■夏萍入行60年一直熱愛演戲，並於05年獲無綫頒「萬千光輝演藝大獎」。
■多年前夏萍腳部出現問題，出入皆要用枴杖。圖片
■近年減產的Apple姐，對上一部作品是跟郭晉安等合作的《末代御醫》。
量血壓不耐煩
昨日有人目睹Apple姐躺在醫院病床，精神不俗，但心情似乎欠佳，護士欲幫她量血壓，但她有點不耐煩說：「又量？」之後不停講電話，着人為她關家中窗戶。記者昨致電Apple姐，問她入院一事，她聲線響亮說：「我跌親梗要入院㗎。」她指前晚入院，已照過X光沒有大礙：「冇大礙，跌親隻腳之嘛。」出院後會否要開工？她說：「我未有嘢開。」
林家棟是Apple姐契仔，昨日他從無綫一舊同事得悉契媽受傷入院，他說：「其實我一直好擔心佢一個人住，之前原本安排佢入老人院，有專人睇住佢，我會放心啲，原本佢答應入，但後來又改變主意，話想再演多一年戲，咁佢想做戲，我都冇得逼佢，但佢一個人住，再有乜閃失就麻煩，我諗住等佢出院，幫佢請個工人，可以日日貼身照顧佢，咁我就放心好多。」
Apple姐已故丈夫張雲是歌唱老師，是梁健平師傅，張雲過身之後，梁健平不時陪伴照顧師母。記者昨致電梁健平，原來他前晚有份陪Apple姐入院，他說：「我噚晚收工時大概8點接到個電話，話Apple姐喺屋企跌親，跌親時間都好長，由朝早捱到夜晚，有人打電話畀佢，佢先至話跌親，坐咗喺屋企郁唔到，我知道就即刻撲過去，佢TVB同事call白車，白車同我同步到現場，一齊上樓接佢去醫院。」
■家棟之前曾打算安排契媽夏萍入住老人院，現會再作計劃。資料圖片
■梁健平昨晚到醫院探望師母，透露前晚有份送師母入院。
「扽親尾龍骨」
問到Apple姐現時情況，梁健平說：「初步照X光冇骨折，尾龍骨有瘀有腫，其他暫時冇乜大礙，我中午都探過佢，佢仲可以食飯，精神狀況還可以。佢下午再照膝頭哥，因為佢行動唔方便，做個詳細檢查先知情況。老人家可能失平衡跣一跣，好彩唔係個頭着地，係pat pat着地，所以扽親尾龍骨。」
梁健平指老人家跌倒可大可小，尤其師母獨居令人擔心，他父親今年5月跌倒受傷後不幸過身，所以呼籲身邊有長者親友是獨居的話，定要加倍關心照顧。至昨晚梁健平再到醫院探望，問可會請看護照顧Apple姐時，他說：「要睇佢老人家意願。」
採訪：魯吉、鍾國仁
攝影：徐錦池
|
鍾意就快D Share啦！
|
|
|
