現年36歲嘅胡杏兒，嚟緊下個月28號同42歲男友李乘德（Philip）結婚，為咗男方傳統客家男孫嘅身份，屆時喺沙頭角新村李氏宗祠拜祠堂同祭祖，甘願將童話式婚禮變客家式婚禮，之後再喺香港嘅Ritz-Carlton擺酒宴客，早前更被本報爆杏兒同Philip今個月5號，即係杏兒生日前夕，二人已入紙排期結婚。
讀者馮先生透過《爆相爆片》，影到杏兒未婚夫Philip於噚晚凌晨1時幾，喺夜蒲諾士佛臺10號一間1樓酒吧，佢都同幾個老外朋友傾偈，亦有個男友人陪佢飲嘢，兼睇波，點知飲幾杯落肚，Philip越嚟越開心，仲同啲女士眉來眼去，片中仲見有兩個索女主動埋身，吹水兼咬耳仔。
據讀者馮先生指，初時嗰兩個女仔係自各坐埋一邊玩game，完全冇同Philip打招呼，Philip同兩女似乎唔識，之但係隔咗冇幾耐，一個著露肩衫嘅女伴，同Philip面貼面咬耳仔，Philip亦好有定力，就算被女撩，佢都冇進一步行動，之但係Philip個表情就好似幾自豪咁，眼神好似向友人講自己仲好有魅力!
跟手又有一個束起頭髮嘅索女走埋去同佢吹水咬耳仔，傾偈嗰陣仲越靠越埋，疑「送波餅」胸壓Philip，兩人仲講到好興奮咁手舞足蹈。讀者又話Philip大約凌晨2點幾，原先班朋友就離開。女友杏兒目前喺天津開工，本報打過畀杏兒，但佢拍緊劇，暫時未聯絡到。
另外，讀者馮先生更指見到張名雅同女友人都喺酒吧，但佢哋兩個唔係飲酒傾偈，不時走嚟走去唔知做乜，相當奇怪!
| 杏兒未婚夫Philip落吧俾女撩兼與女伴「咬耳仔」。（右圖為讀者提供圖片） |  Philip對一開始主動撩佢傾偈嘅女伴比較冷淡。(讀者提供圖片) |  (讀者提供圖片) |
 不過俾女撩完，Philip都忍唔住展露自信嘅笑容。(讀者提供圖片) |  跟手Philip似乎同另一位女伴啱傾啲。(讀者提供圖片) |  (讀者提供圖片) |
 二人睇波傾偈，傾得幾開心。(讀者提供圖片) |  馬尾女仲搭住Philip膊頭。(讀者提供圖片) |  (讀者提供圖片) |
|
鍾意就快D Share啦！
|
|
|
