謝婷婷同攝影師戴尚安嘅戀情未夠一年已玩完，去年11月男方搶先喺社交網公告分手，回復單身嘅婷婷孔雀開屏，身邊男伴車輪轉，雖然上月被影到同老外去金鐘睇戲，但婷婷嘅真命天子原來另有其人！噚日讀者C小姐透過本報「爆相爆料」，分享婷婷同鬍鬚鬼佬新歡A貨英超球星禾確特（Theo Walcott）到河內過完聖誕，喺Boxing Day拍拖返港嘅相片。C小姐接受電話訪問表示：「5點幾喺河內機場，見到佢哋喺香港航空辦check in，一齊坐經濟客位，佢哋等到最後先上機，機上係三人座位，佢哋坐第一行，婷婷坐窗口位，鬼佬坐路邊位，中間個位就留空，可能驚人知，婷婷好避忌，一上飛機就戴口罩，返到香港等行李又分開企，不過鬼佬好有風度，幫佢擺行李同攞行李。」本報記者噚晚趕到機場守候，婷婷同「鬚根禾確特」乘搭嘅HX529班機，喺晚上約8點40分抵港，45分鐘後婷婷才姍姍由B閘步出，助手接過佢嘅行李，婷婷一馬當先行去A閘，仲使出蛇形箭步嘅腳法，刻意同鬼佬新歡相距成條街咁遠，扮到完全唔識咁款，以為可以呃到人，可惜棋差一着，「鬚根禾確特」由婷婷嘅助手陪住行去停車場，已經出賣咗佢哋嘅親密關係。警覺性甚高嘅婷婷，邊行邊傾電話，行行吓又停低面向玻璃不停㩒手機，搞咗一大輪才去停車場，一個箭步上車孖新歡返灣仔嘅香閨度春宵。
來源 source: http://hk.apple.nextmedia.com
|
鍾意就快D Share啦！
|
|
|
