無綫行政總裁李寶安早排下令「優化」戲劇組，助理總經理杜之克即刻做嘢，聽聞佢認為有5部劇拍得好差，所以日前開內部會議後決定將嗰5部抽起唔播，無限期雪藏。
5套劇包括黎耀祥同胡杏兒主演嘅《巾幗梟雄之諜血長天》、馬國明嘅《流氓皇帝》、張兆輝同陳敏之主演嘅《性在有情》、陳慧珊嘅《波士早晨》，以及郭晉安同楊怡嘅《末代御醫》。
嘥咗7500萬
一集劇製作費約60萬元，有幾部劇去內地拍外景，每集起碼80萬元，𠵱家5部劇夾埋115集，無綫起碼丟咗7,500萬元落鹹水海，但杜之克覺得本土製作唔掂，寧願播外購劇，好似今晚無綫黃金時段就會播內地劇《無心法師》，而無綫手頭上買咗好多部內地劇，嚟緊香港觀眾「有排嘆」！對於《流》劇被雪藏，馬國明噚日話：「未經證實，冇回應。」至於陳敏之就話：「冇聽過，如果冇得播當然好可惜，但我會尊重公司嘅決定。」
其實除咗《巾》劇之外，咁啱其餘4部都係已離職嘅高層梁家樹旗下監製拍落嘅，𠵱家全部入雪櫃，所謂一朝天子一朝臣，難怪早排羅家英話：「梁系已飄蓬葉落，你明白的。」
撰文：馮仁昭
|
鍾意就快D Share啦！
|
|
|
