亞視執董葉家寶噚晚於博客文章，宣佈辭去亞洲電視執行董事的職務，葉家寶今早11點多，一面臉容憔悴，如常返回亞視。
問及心情如何，家寶一度右眼眼濕濕表示心情仍未平伏：「雖然話終於有個決定，我呢個決定都可以講得係事先張揚嘅辭職，喺幾個月前已經喺董事會講過，即係話公司如果再發唔到人工、種種因素等，我自己都覺得作為執行董事，我都無能為力，所以嗰時已經事先張揚，同埋幾日前我都不斷講如果喺呢幾個月嘅勞工處法例規定之下，公司仲未發到人工嘅話，我別無選擇，我一定要辭職，所以今次辭職都係別無選擇。」
家寶續言：「我自己最痛心、最唔開心嘅，就係要暫時離開啲同事，因為真係同啲同事打拼咗咁耐，當時我都講希望自己一路係堅持，我總算覺得喺呢個階段係一個堅持之後嘅終結，因為始終睇到公司有新嘅方向、新嘅老闆，應該話係有個新嘅投資者，令到公司一路有新嘅做法。」
家寶又指：「我自己跟住會點?自己都未有一個計劃，雖然話呢個係事先張揚嘅辭職，始終都冇一個計劃，可能係讀下書，或者一個長假期去休息下，我自己都唔係即時馬上離開公司，只係執行董事呢個職位，我唔能夠再喺度有呢個職位，公司喺短期內有啲交接各方面，我都會喺度，盡量令公司運作順暢。」
問他知不知道執行董事繼任人選，家寶笑言：「暫時都未有，呢個咁危險嘅職位，有冇人肯當，我喺度諗緊，我相信今次法庭判決係俾到所有公司董事、負責人、執行董事一個好明確嘅信訊，對我嚟講，係一個終身難忘嘅教訓。」講到公司沒有執行董事一職，運作會否有影響，他表示：「公司係一個董事會運作，有我哋嘅行政，我相信一間運作咁耐嘅公司，一個已經咁制度化嘅公司，我相信一定唔會有問題。」家寶指自己喺公司有兩個職位，一個係執行董事、一個係高級副總裁，暫時以高級副總裁呢個職位留喺公司幫助同事。
|
鍾意就快D Share啦！
|
|
|
