Ricky扯火：差佬嚟你玩X完！
太極鼓手朱翰博（Ricky）與糟糠離婚問題未解決，身為Ricky女友的戴夢夢難免躁爆！繼早前在街頭四度剝裙後，最新一期《好報》拍得夢夢在Ricky開車期間，三度打開車門「企跳」，Ricky見狀火都嚟，爆粗大罵女友：「如果有差佬嚟，你即刻玩X完！」昨晚夢夢現身時對於「企跳」一事發爛渣，堅稱自己是落車並非跳車，更擺款示意工作人員推開記者，充滿火藥味！
戴夢夢於5月底被《好報》拍得在街頭發男友Ricky脾氣，做出四度剝裙的驚人壯舉，至上月尾她才表示發脾氣才做出「能人所不能」的行為，實不應該這樣做。惟講完不夠幾日，最新一期《好報》再拍得她與Ricky在上月23日晚上，又在街頭吵大鑊，Ricky揸車回家期間，身為乘客的夢夢三度打開車門「企圖跳車」，Ricky見女友行為過火，立即爆粗鬧爆她：「你點對我呀？我揸緊車你跳車？你閂唔閂X門呀？我話X畀你聽，如果有差佬嚟，你即刻玩X完！」
「我只係想落車」
夢夢「企跳」事件爆出，即全城熱議，女主角夢夢昨晚在銅鑼灣一活動現身時，面對記者提問全程擺款兼發爛渣，對「企跳」一事回應說：「冇乜嘢啫，唔係大件事，啲相係上個月影到，我哋都唔記得喇！（又嗌交？）情侶少不免有摩擦，小事！」問她是否覺得行為過激？她顯得愈來愈躁：「你哋問埋呢啲問題，我唔答！（點解次次出街都嗌交？）點解你哋成日影我吖？（點解打開車門『企跳』？）唔係，我只係想落車。」
問她是否知道犯法？夢夢立即怒睥記者，令現場充滿火藥味，並說：「總之好小事，我哋感情好好。」並示意工作人員推開記者，當記者再次圍埋再追問她跟Ricky何時結婚？夢夢表示不想再講，問是否不滿Ricky未辦妥離婚？她即呼喝記者，沒有理會問題：「畀我行」當有記者表示以後不再問她問題時，夢夢始死死地氣說：「私人嘢唔講喇！」
男主角話普通嘢
在此之前，夢夢昨日先現身韓國天王Rain的演唱會發布會，當她被問到是否嬲男友因未辦妥離婚而發脾氣？為何「企跳」？是否知道犯法？等問題時，她煞有介事刻意迴避，只說「唔答、唔答」即告離去。至於幾乎被夢夢玩謝的Ricky回覆本報時，竟然覺得夢夢「企跳」是「碎料」：「其實呢啲嘢成日都影到，我覺得好普通，我食緊飯，唔講喇，拜拜！」
由街頭鬧到返歸
事緣上月23日晚，「朱夢」現身灣仔星街先來一輪罵戰，二人其後開車往春園街晚膳，食飽儲夠力氣後，他們再嘈過。糾纏數分鐘後，夢夢終肯上車返歸。惟Ricky的保時捷座駕駛至菲林明道和駱克道交界燈位時，在黃轉紅燈期間，身為乘客的夢夢突然打開車門，只見二人在車廂中拉扯並傳出破口大罵聲，到轉綠燈時，雙方仍擾攘起碼兩、三分鐘Ricky才開車直駛大坑方向。
駛至大坑永興街，Ricky的「波子」愈揸愈快又胡亂Cut線，險象環生。夢夢跟住把行動升級，當駛至天后廟道時再次打開車門，令情況更為驚險。數分鐘後駛至家門口對出的雲景道，夢夢二不離三，在行駛期間再玩嘢第三次打開車門「企跳」，Ricky即時急急煞掣停車，最後搞到Ricky破口大罵，夢夢才肯罷休。
文：專案組
攝：追蹤組
|
鍾意就快D Share啦！
|
|
|